၂၁။ ခမဳဟွံစဳကၠး ဟွံဆိုက်ဗ္ဒက်ဂမၠိုၚ်

၈၂။ ပ္ဍဲကာလမွဲခိၚ် ခမဳဂမၠိုၚ် “ပိုညးဂမၠိုၚ် ဂွံစှ်ဝသ်တုဲအိုတ်ရ၊ ဂွံစှ်ဝသ်တုဲအိုတ်ရ” ရဴတွံ သီုဟွံတီဟွံစဳကၠး (ပ္ဍဲဝိနယ်သိက္ခာပိုဒ်) ဂမၠိုၚ်ဂှ် ကဵုအရာနိဿဲဗ္ဒာဲ (နိဿယ) အိုတ်ရ။ သ္ဂောံဆဵုညာတ်ကေတ် အ္စာ (နိဿယ) မဟွံတီမဒိုဟ်ဓီု ကေုာံကွးပဒတဴဇရေၚ် မဍိုက်ကေက်၊ အ္စာ (နိဿယ) မဟွံစဳကၠးဆိုက်ဗ္ဒက် ကေုာံကွးပဒတဴဇရေၚ် မစဳကၠးဆိုက်ဗ္ဒက်၊ အ္စာ (နိဿယ) မအောန်ကဵုလမိၚ်လညာတ် ကေုာံကွးပဒတဴဇရေၚ် လမိၚ်လညာတ်ဂၠိုၚ်၊ အ္စာ (နိဿယ) မဟွံမွဲကဵုပညာ ကေုာံကွးပဒတဴဇရေၚ် မၞုံကဵုပညာအိုတ်ရ။ ခမဳပၟိက်အောန်ဂမၠိုၚ်ဂှ် “ခမဳဂမၠိုၚ် ‘ဂွံစှ်ဝသ်တုဲအိုတ်ရ၊ ဂွံစှ်ဝသ်တုဲအိုတ်ရ’ ရဴဝွံ သီုဟွံတီဟွံစဳကၠး (ပ္ဍဲဝိနယ်သိက္ခာပိုဒ်) ဂမၠိုၚ်ဂှ် မုဟိုတ် ကဵုအရာနိဿဲဗ္ဒာဲ (နိဿယ) အိုတ်ရော? သ္ဂောံဆဵုညာတ်ကေတ် အ္စာ (နိဿယ) မဟွံတီမဒိုဟ်ဓီုကေုာံကွးပဒတဴဇရေၚ် မဍိုဟ်ကေက်၊ အ္စာ (နိဿယ) မဟွံစဳကၠးဆိုက်ဗ္ဒက် ကေုာံကွးပဒတဴဇရေၚ် မစဳကၠးဆိုက်ဗ္ဒက်၊ အ္စာ (နိဿယ) မအောန်ကဵုလမိၚ်လညာတ် ကေုာံကွးပဒတဴဇရေၚ် လမိၚ်လညာတ်ဂၠိုၚ်၊ အ္စာ (နိဿယ)မဟွံကဵုပညာ ကေုာံကွးပဒတဴဇရေၚ် မၞုံကဵုပညာအိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။

ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ခမဳဂမၠိုၚ် ‘ဂွံစှ်ဝသ်တုဲအိုတ်ရ၊ ဂွံစှ်ဝသ်တုဲအိုတ်ရ’ ရဴဝွံ သီုဟွံတီဟွံစဳကၠး (ပ္ဍဲဝိနယ်သိက္ခာပိုဒ်) ဂမၠိုၚ်ဂှ် ကဵုအရာနိဿဲဗ္ဒာဲ (နိဿယ) အိုတ်ရ ။ ပ ။ ဟီုဂှ် ဍာံပြရဟာ” ရဴဝွဴ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။

တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး “ယွံခမဳတအ် ခမဳမဟွံတီဟွံစဳကၠး (ပ္ဍဲဝိနယ်သိက္ခာပိုဒ်) ဂှ် ဟဂပ်ဝ်ကဵုအရာနိဿဲဗ္ဒာ (နိဿယ) ရ၊ ယြဴခမဳမွဲ ကဵုအရာနိဿဗ္ဒာဲ (နိဿယ) မ္ဂး၊ ကုခမဳဂှ် ဒးအာပတ်ဒုက္ကဋ်ရ။ ယွံခမဳတအ် ခမဳမကလိဂွံစှ်ဝသ်တုဲ စဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်) တုဲ မၞုံကဵုအစောံသတ္တိဂှ်ကီု ခမဳမကလိလောန် လတူစှ်ဝသ်တုဲကီု ကဵုအခေါၚ် တၞဟ်နကဵုအရာနိဿဲဗ္ဒာဲ (နိဿယ) ရ” ရဴဝွံ သ္ဂးကဵုခမဳဂမၠိုၚ်ရ။