၄.၉.၃။ သိက္ခာပိုဒ်တတိယ

1190) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴမွဲဇကု ဒှ်ခမဳဗြဴအ္စာ ဗြဴမွဲတၠရ။ ပ္ဍဲအခိၚ်ဂှ် ဗြဴဂှ် “ယွံနာဲဗြဴ ဇုက်ဂ္ညိဂၞိၚ်ဝွံ ဩဝ်ကဵုထောံ ကုဗြဴမၞုံယၟုဝွံညိ” ရဴဝွံ ဟီုသ္ဂးကဵုခမဳဗြဴဂှ်ရ။ ပ္ဍဲအခိၚ်ဂှ် ခမဳဗြဴဂှ် “ယဝ်အဲ ဂိုၚ်ကေတ်ဏာ နကဵုဗဗေၚ်ဝွံမ္ဂး၊ ဗရုရမျာၚ်မပၠန်ဂတး ကြက်ဒှ်ကုအဲရ” ရဴဝွံ သၠိုက်စုတ် ပ္ဍဲဂၞိၚ်တုဲ အာတဴရ။ တောဝ်တသာဲဇုက်ဂ္ညိဂၞိၚ်ဂမၠိုၚ် ပိုတ်အာမ္ဂး (ရတ်မတ်မၞိက်ဂမၠိုၚ်) ပြးဆာဲအာ ပ္ဍဲဂၠံၚ်တရဴသွာၚ်အိုတ်ရ။ မၞိဟ်ဂမၠိုၚ် “မုဟိုတ် ခမဳဗြဴဂမၠိုၚ် ညံၚ်ရဴမၞိဟ်ဗြဴမဒုၚ်စသိုၚ် ကာမဂုဏ်ဂမၠိုၚ်ကီု ပကၚ်ရၚ်လဝ် ဇုက်ဂ္ညိဂၞိၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဗြဴဂမၠိုၚ် သ္ဂောံမိၚ်ကတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ပကၚ်ရၚ်လဝ် ဇုက်ဂ္ညိဂၞိၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် ပကၚ်ရၚ်လဝ် ဖုက်ဂ္ညိဂၞိၚ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂှ် ပကၚ်ရၚ်လဝ် ဇုက်ဂ္ညိဂၞိၚ်ရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1191) “ယြဴခမဳဗြဴမွဲ ပကၚ်ရၚ် ဇုက်ဂ္ညိဂၞိၚ်မ္ဂး (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵု စၞောန်ထ္ၜးအိုတ်ညိ ရဴဝွံ သ္ဂးရ)။