၄.၉.၁၃.၁။ ပွံက်သိက္ခာပိုဒ်တေရသမ

1226) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။

သီုဟွံမွဲကဵုယာတ်ဂြောပ်သြိုဟ် မ္ဂးဂှ် (ယာတ်မဒးသ္ပသုၚ်စောဲ) တၞဟ်နဂြောပ်ဗ္ဒန် သၟဝ်ဇုတ်ကၞၚ်ကအ် လတူပံၚ်ကဠုတ်ရောၚ်။ လုပ်အာကွာန် မ္ဂးဂှ် ကုခမဳဗြဴမကဵုကလိလောန်အာ အစဵုအဗိုၚ် ကွာန်မၞုံကဵုအစဵုအဗိုၚ်ဒပ်မ္ဂး၊ ဒးအာပတ်ပဲါစိုတ်ရ။ ကုခမဳဗြဴမတၞီလုပ်ဥပစာ ကွာန်မဟွံမွဲကဵုအစဵုအဗိုၚ်ဒပ်မ္ဂး၊ ဒးအာပတ်ပဲါစိုတ်ရ။

1227) ကုခမဳဗြဴမၞုံကဵုသ္ၚာဒးဒုၚ်ပၠံၚ်ၜးဏာ ခမဳဗြဴမၞုံကဵုသ္ၚာကၠေံလေၚ်အာ ခမဳဗြဴမဂိယဲ ခမဳဗြဴဝိုတ်အာသတိ ခမဳဗြဴမဟွံတီ ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ်လေဝ်၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်တေရသမတုဲရ။ ဆတ္တုပ္ပါဟနဝဂ်နဝမတုဲ။

ယွံနာဲဗြဴတအ် အာပတ်ပဲါစိုတ်ဂမၠိုၚ်ကၠံတြဴစှော်တြဴဝွံ ဂပ်ဝ်စၞောန်ထ္ၜး ဗွဲသရုပ်တုဲအိုတ်ရ၊ ပ္ဍဲအာပတ်ပဲါစိုတ်ဂမၠိုၚ်ကၠံတြဴစှော်တြဴဂှ် သၟာန်နာဲဗြဴဂမၠိုၚ်ရ၊ သအးဇ္ၚးနူအာပတ်အိုတ်ရဟာ၊ မရနုက်ကဵုၜါဝါလေဝ် သၟာန်ရ၊ သအးဇ္ၚးနူအာပတ်အိုတ်ရဟာ၊ မရနုက်ကဵုပိဝါလေဝ် သၟာန်ရ၊ သအးဇ္ၚးနူအာပတ်အိုတ်ရဟာ၊ နာဲဗြဴတအ်ညးဂမၠိုၚ် ပ္ဍဲအာပတ်ပဲါစိုတ်ဂမၠိုၚ်ကၠံတြဴစှော်တြဴဝွံ သအးဇ္ၚးနူအာပတ်အိုတ်ရ၊ ဟိုတ်ဂှ်ရ ဒၟံၚ်သ္ၚိတ်သ္ၚိတ်ဇြဇြအိုတ်ရ၊ ရဴဝွံ နမဒၟံၚ် သ္ၚိတ်သ္ၚိတ်ဇြဇြဂှ် ဂွံသမ္တီကေတ် ဒဒှ်သအးဇ္ၚးနူအာပတ်ဝွံရ။

ဘိက္ခုနဳဝိဘၚ် ခဏ်ပဲါစိုတ်တုဲရ။