၄.၉.၁၃။ သိက္ခာပိုဒ်တေရသမ

1224) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴမွဲဇကု သီုဟွံမွဲကဵုယာတ်ဂြောပ်သြိုဟ် လုပ်ဂ္ၚေၚ်ပိဏ္ဍပါတ်အပ္ဍဲကွာန်ရ။ သ္ၚာသကိုပ်ခမဳဗြဴဂှ်ဂမၠိုၚ် ကျာပလက်ပိုက်တုဲ ကဝဲဏာ ပ္ဍဲဂၠံၚ်တရဴသွာၚ်အိုတ်ရ။ ဂကောံမၞိဟ်ဂမၠိုၚ် “ဖျုန်ပရဲ နာဲဗြဴဂှ်ဂမၠိုၚ် ဂေါဝ်ဆာဲအိုတ်ရ” ရဴဝွံ က္ညာၚ်ကရေဲအိုတ်ရ။ ခမဳဗြဴဂှ် မၞိဟ်ဂမၠိုၚ်ဂှ် သ္ပဂရိုၚ်စရဵုဟီုဗျံက်ဂှ်ရ မုက်မတ်ဟွံကျေဝ်ဒှ်အာရ။ ခမဳဗြဴဂှ် အာ အာရှာမ်ဘာတုဲမ္ဂး ဟီုလဴဗ္စ ဟိုတ်ပရူပရာဝွံ ကုခမဳဗြဴသအာၚ်ဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် သီုဟွံမွဲကဵုယာတ်ဂြောပ်သြိုဟ် လုပ်အာကွာန်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် သီုဟွံမွဲကဵုယာတ်ဂြောပ်သြိုဟ် လုပ်အာကွာန်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂှ် သီုဟွံမွဲကဵုယာတ်ဂြောပ်သြိုဟ် လုပ်အာကွာန်ရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1225) “ယြဴခမဳဗြဴမွဲ ခမဳဗြဴဂှ် သီုဟွံမွဲယာတ်ဂြောပ်သြိုဟ် လုပ်အာ ကွာန်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။