၄.၉.၁.၁။ ပွံက်သိက္ခာပိုဒ်ပဌမ

1181) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ သီုဟွံဂိယဲ မ္ဂးဂှ် ယြဴကုခမဳဗြဴမွဲ စာ်စ္ဍးအာကေုာံက္ဍိုၚ်ဒၞပ်တုဲ ဒှ်တသိုခ်ရ။ ဂိယဲ မ္ဂးဂှ် ယြဴကုခမဳဗြဴမွဲ စာ်စ္ဍးအာကေုာံက္ဍိုၚ်ဒၞပ်တုဲ ဟွံဒှ်တသိုခ်ရ။ က္ဍိုၚ် မ္ဂးဂှ် ဗွဲအစောံ က္ဍိုၚ်ဗတာၚ် က္ဍိုၚ်သကဝ် က္ဍိုၚ်သၠဆု မဗန်ဒက်လဝ်ခရိုၚ် (ကၠံက်က္ဍိုၚ်) ဗွဲဗၞဳအဝဏ် နကဵုဇြေဟ်ဒုန်ဂမၠိုၚ် ရဴဝွံ မၞုံပိဂကူရ။ ပကၚ်ရၚ်မ္ဂး မ္ဂးဂှ် ၜိုန်ပကၚ်ရၚ်ဗၞတ်မွဲဝါဟေၚ်လေဝ် ဒးအာပတ်ပဲါစိုတ်ရ။

1182) သီုဟွံဂိယဲ မၞုံကဵုစၟတ်သမ္တီ ဟွံဂိယဲဒှ်တုဲ ပကၚ်ရၚ်က္ဍိုၚ်ဒၞပ်မ္ဂး၊ ဒးအာပတ်ပဲါစိုတ်ရ။ သီုဟွံဂိယဲ မၞုံကဵုသၠေဟ်ပၟာဒှ်တုဲ ပကၚ်ရၚ်က္ဍိုၚ်ဒၞပ်မ္ဂး၊ ဒးအာပတ်ပဲါစိုတ်ရ။ သီုဟွံဂိယဲ မၞုံကဵုစၟတ်သမ္တီ ဂိယဲဒှ်တုဲ ပကၚ်ရၚ်က္ဍိုၚ်ဒၞပ်မ္ဂး၊ ဒးအာပတ်ပဲါစိုတ်ရ။ ပကၚ်ရၚ်က္ဍိုၚ်ဟေၚ်တုဲ ဟွံပကၚ်ရၚ်ဒၞပ်မ္ဂး၊ ဒးအာပတ်ဒုက္ကဋ်ရ။ ပကၚ်ရၚ်ဒၞပ်ဟေၚ်တုဲ ဟွံပကၚ်ရၚ်က္ဍိုၚ်မ္ဂး၊ ဒးအာပတ်ဒုက္ကဋ်ရ။ သီုမဂိယဲ မၞုံကဵုစၟတ်သမ္တီ ဟွံဂိယဲမ္ဂး၊ ဒးအာပတ်ဒုက္ကဋ်ရ။ သီုမဂိယဲ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ သီုမဂိယဲ မၞုံကဵုစၟတ်သမ္တီ ဂိယဲမ္ဂး၊ ဟွံဒးအာပတ်ရ။

1183) ကုခမဳဗြဴမဂိယဲ ဟွံဒးအာပတ်ရ၊ ပကၚ်ရၚ် ပ္ဍဲအာရှာမ်ကီု ပ္ဍဲဥပစာအာရှာမ်ကီုမ္ဂး၊ ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ်လေဝ်၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ပဌမတုဲရ။