၄.၈.၉.၁။ ပွံက်သိက္ခာပိုဒ်နဝမ

1160) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ တြုံဇၞော် မ္ဂးဂှ် ညးမအာစိုပ် အာယုက်ၜါစှော်တုဲရောၚ်။ တြုံသၟတ် မ္ဂးဂှ် ညးဟွံအာစိုပ်အာယုက်ၜါစှော်သၞာံဏီရောၚ်။ ပွမနှဴရဴ မဂးဂှ် နှဴရဴစပ်တဴ နအကာဲအရာဇကု အကာဲအရာပါၚ် မဟွံဗဗွဲရ။ မကြမ်ကြသအဵုသအာ် မ္ဂးဂှ် သ္ဂးတဴပွမပၞတ်တိတ်ရ။ မလေပ်ပၠုပ်အစံၚ်အတူပ္ဍဲတြုံ မ္ဂးဂှ် လေပ်ကတဵုဗဒှ်ကဵုပွမဒှ်ဒဒိုခ် ကညးသအာၚ်ဂမၠိုၚ်ရ၊ တၞီလုပ်သောကရ။ သိက္ခမာန် မ္ဂးဂှ် ဗြဴမဒ္ဂေတ်လ္ၚတ်လဝ် သိက္ခာပိုဒ်ဂမၠိုၚ်တြဴ လုကဴၜါသၞာံဂမၠိုၚ်တုဲရောၚ်။ သ္ပကဵုခမဳ မ္ဂးဂှ် ဒုၚ်ကဵုပယျၚ်မ္ဂး။ “ကြက်သ္ပကဵုပယျၚ်ရ” ရဴဝွံ ဂၠာဲသ္ၚေဝ် ဂိုဏ်ကီု အ္စာဗြဴကီု ဗဗေၚ်ကီု သ္ၚာကီုမ္ဂး၊ သိမ်လေဝ်သၟိတ် (ထ္ၜုတ်) မ္ဂး၊ ဒးအာပတ်ဒုက်ကဋ်ရ။ ပ္ဍဲလအိတ်ဉတ် ဒးအာပတ်ဒုက္ကဋ်ရ၊ ပ္ဍဲလအိတ်ကမ္မဝါစ်ဂမၠိုၚ်ၜါဝါ ဒးအာပတ်ဒုက္ကဋ်ဂမၠိုၚ်အိုတ်ရ။ ပ္ဍဲလအိတ်ကမ္မဝါစ် ကုအ္စာဥပဇ္ၛာယ်ဂှ် ဒးအာပတ်ပဲါစိုတ်ရ၊ ကုဂိုဏ်ကီု ကုအ္စာဗြဴဂမၠိုၚ်ကီု ဒးအာပတ်ဒုက္ကဋ်ရ။

1161) ဟွံတီတုဲ သ္ပကဵုခမဳမ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်နဝမတုဲရ။