၄.၈.၉။ သိက္ခာပိုဒ်နဝမ

1158) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ သ္ပကဵုခမဳသိက္ခမာန်စဏ္ဍကာဠဳ မနှဴရဴကေုာံတြုံဇၞော်တြုံသၟတ်ဂမၠိုၚ် မကြမ်ကြသအဵုသအာ် မလေပ်ပၠုပ်အစံၚ်အတူပ္ဍဲတြုံရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ သ္ပကဵုခမဳ သိက္ခမာန်စဏ္ဍကာဠဳ မနှဴရဴကေုာတြုံဇၞော်တြုံသၟတ်ဂမၠိုၚ် မကြမ်ကြသအဵုသအာ် မလေပ်ပၠုပ်အစံၚ်အတူပ္ဍဲတြုံရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ သ္ပကဵုခမဳ သိက္ခမာန်စဏ္ဍကာဠဳ မနှဴရဴကေုာံတြုံဇၞော် တြုံသၟတ်ဂမၠိုၚ် မကြမ်ကြသအဵုသအာ် မလေပ်ပၠုပ်အစံၚ်အတူပ္ဍဲတြုံရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ သ္ပကဵုခမဳ သိက္ခမာန်စဏ္ဍကာဠဳ မနှဴရဴကေုာံတြုံဇၞော်တြုံသၟတ်ဂမၠိုၚ် မကြမ်ကြသအဵုသအာ် မလေပ်ပၠုပ်အစံၚ်အတူပ္ဍဲတြုံရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ်စၞောန်ထ္ၜး သိက္ခာပိုဒ်ဝွံအိုတ်ညိ။

1159) “ယြဴခမဳဗြဴမွဲ သ္ပကဵုခမဳ သိက္ခမာန် မနှဴရဴကေုာံတြုံဇၞော်တြုံသၟတ်ဂမၠိုၚ် မကြမ်ကြသအဵုသအာ် မလေပ်ပၠုပ်အစံၚ်အတူတြုံမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜး အိုတ်ညိ ရဴဝွံ သ္ဂးရ)။