၄.၈.၈။ သိက္ခာပိုဒ်အဋ္ဌမ

1154) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် သိက္ခမာန်မွဲ ပြာပ်အာဇရေၚ်ခမဳဗြဴထုလ္လနန္ဒာတုဲ အာတ်ဒဒှ်ပယျၚ်ရ။ ခမဳဗြဴထုလ္လနန္ဒာဂှ် “ယွံနာဲဗြဴ တၠအဲ ယဝ်ဗက်အာတုဲ လုကဴၜါသၞာံဂမၠိုၚ်မ္ဂး အဲကြက်သ္ပကဵုခမဳ တၠအဲရ” ရဴဝွံ ဟီုသ္ဂးကဵုတုဲ ဟွံသ္ပကဵုခမဳ သိက္ခမာန်ဂှ်ရ၊ တၞဟ်နပွမသ္ပကဵုခမဳလေဝ် ဟွံလွဳပရာရ။ ပ္ဍဲအခိၚ်ဂှ် သိက္ခမာန်ဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာဂှ် ‘ယွံနာဲဗြဴ တၠအဲ ယဝ်ဗက်အာအဲ လုကဴၜါသၞာံဂမၠိုၚ်မ္ဂး အဲကြက်သ္ပကဵုခမဳ တၠအဲရ’ ရဴဝွံ ဟီုသ္ဂးတုဲ ဟွံသ္ပကဵုခမဳ သိက္ခမာန်ဂှ်ရော? တၞဟ်နပွမသ္ပကဵုခမဳလေဝ် ဟွံလွဳပရာရေ?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာဂှ် ‘ယွံနာဲဗြဴ တၠအဲ ယဝ်ဗက်အာအဲ လုကဴၜါသၞာံဂမၠိုၚ်မ္ဂး အဲကြက်သ်ပကဵုခမဳ တၠအဲရ’ ရဴဝွံ ဟီုသ္ဂးတုဲ ဟွံသ္ပကဵုခမဳ သိက္ခမာန်ဂှ်ရ၊ တၞဟ်နပွမသ္ပကဵုခမဳလေဝ် ဟွံလွဳပရာရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ယွံခမဳတအ် မုဟိုတ် ခမဳဗြဴ ထုလ္လနန္ဒာဂှ် ‘ယွံနာဲဗြဴ ယဝ်ဗက်အာအဲ လုကဴၜါသၞာံဂမၠိုၚ်မ္ဂး အဲကြက်သ္ပကဵုခမဳ တၠအဲရ’ ရဴဝွံ ဟီုသ္ဂးတုဲ ဟွံသ္ပကဵုခမဳ သိက္ခမာန်ဂှ်ရော? တၞဟ်နပွမကဵုသ္ပကဵုခမဳလေဝ် ဟွံလွဳပရာရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1155) “ယြဴခမဳဗြဴမွဲ ‘ယွံနာဲဗြဴ တၠအဲ ယဝ်ဗက်အာအဲ လုကဴၜါသၞာံဂမၠိုၚ်မ္ဂး အဲကြက်သ္ပကဵုခမဳ တၠအဲရ’ ရဴဝွံ ဟီုသ္ဂးသိက္ခမာန်တုဲ ခမဳဗြဴဂှ် ပ္ဍဲကာလကြဴ သီုဟွံမွဲကဵုအန္တရာယ် (သ္ပဥပဇ္ၛာယ်တုဲ) ဟွံသ္ပကဵုခမဳမ္ဂး၊ တၞဟ်နပွမသ္ပကဵုခမဳလေဝ် ဟွံလွဳပရာမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။ ပွံက်သိက္ခာပိုဒ်အဋ္ဌမ