၄.၈.၆။ သိက္ခာပိုဒ်ဆဋ္ဌ
1146) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴစဏ္ဍကာဠဳ ပြာပ်အာဇရေၚ်သၚ်တုဲ အာတ်ဝုဋ္ဌာပနသမ္မုတိရ။ ပ္ဍဲအခိၚ်ဂှ် ဘိက္ခုနဳသၚ် ပိုၚ်အခြာတုဲ “ယွံနာဲဗြဴ တၠအဲ သွက်ဂွံသ္ပဥပဇ္ၛာယ် ဟွံထေက်ကြိုက်ဏီရ” ရဴဝွံ (ဟီုသ္ဂးတုဲ) ဟွံကဵုဝုဋ္ဌာပနသမ္မုတိ ကုခမဳဗြဴစဏ္ဍကာဠဳရ။ ပ္ဍဲအဃောအခိၚ်ဂှ် ဘိက္ခုနဳသၚ် ကဵုဝုဋ္ဌာပနသမ္မုတိ ကုခမဳဗြဴသအာၚ်ဂမၠိုၚ်ရ၊ ခမဳဗြဴစဏ္ဍကာဠဳဂှ် “အဲဟေၚ် ဓီုၜီုဟာ၊ အဲဟေၚ် ဒှ်ဗြဴအလဇ္ဇဳဟာ၊ သၚ်ဂှ် ကုခမဳဗြဴသအာၚ်ဂမၠိုၚ် မသအာၚ်နူအဲတုန် ကဵုတဴဝုဋ္ဌာပနသမ္မုတိရ၊ ကုအဲဟေၚ် ဟွံကဵုတဴဝုဋ္ဌာပနသမ္မုတိရ” ရဴဝွံ ဟီုဂရိုဟ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴစဏ္ဍကာဠဳဂှ် ‘ယွံနာဲဗြဴ တၠအဲ သွက်ဂွံသ္ပဥပဇ္ၛာယ် ဟွံထေက်ကြိုက်ဏီရ’ ရဴဝွံ ဟီုသ္ဂး ခိုဟ်သန်ရ ရဴဝွံ ဒုၚ်ဝန်တုဲ ပ္ဍဲကာလကြဴ အာစိုပ်ပွမဟီုဂရိုဟ်ပျုတ်ဗ္ဒေက်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴစဏ္ဍကာဠဳဂှ် ‘ယွံနာဲဗြဴ တၠအဲ သွက်ဂွံသ္ပဥပဇ္ၛာယ် ဟွံထေက်ကြိုက်ဏီရ’ ရဴဝွံ ဟီုသ္ဂးမ္ဂး ခိုဟ်သန်ရ ရဴဝွံ ဒုၚ်ဝန်တုဲ ပ္ဍဲကာလကြဴ အာစိုပ်ပွမဟီုဂရိုဟ်ပျုတ်ဗ္ဒေက်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴစဏ္ဍကာဠဳဂှ် ‘ယွံနာဲဗြဴ တၠအဲ သွက်ဂွံသ္ပဥပဇ္ၛာယ် ဟွံထေက်ကြိုက်ဏီရ’ ရဴဝွံ ဟီုသ္ဂးမ္ဂး ခိုဟ်သန်ရ ဒုၚ်ဝန်တုဲ ပ္ဍဲကာလကြဴ အာစိုပ်ပွမဟီုဂရိုဟ်ပျုတ်ဗ္ဒေက်ရော? ယွံခမဳတအ် (ကမၠောန်ပွခမဳဗြဴစဏ္ဍကာဠဳ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
1147) “ယြဴခမဳဗြဴမွဲ ‘ယွံနာဲဗြဴ တၠအဲ သွက်ဂွံသ္ပဥပဇ္ၛာယ် ဟွံထေက်ကြိုက်ဏီရ’ ရဴဝွံ ဟီုသ္ဂးမ္ဂး ခိုဟ်သန်ရ ရဴဝွံ ဒုၚ်ဝန်တုဲ ပ္ဍဲကာလကြဴ အာစိုပ်ပွမဟီုဂရိုဟ်ပျုတ်ဗ္ဒေက်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
