၄.၈.၅.၁။ ပွံက်သိက္ခာပိုဒ်ပဉ္စမ

1143) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳဗြဴရ။ မပေၚ်စှ်ၜါဝှ်တုဲ မ္ဂးဂှ် ညးမအာစိုပ်စှ်ၜါဝှ်တုဲရောၚ်။ မဟဂွံသၟိတ်လဝ်ဏီ မ္ဂးဂှ် မဟဂွံကဵုဝုဋ္ဌာပနသမ္မုတိ နကဵုဉတ္တိဒုတိယကမ်ဏီ။ သ္ပကဵုခမဳ မ္ဂးဂှ် ဒုၚ်ကဵုပယျၚ်မ္ဂး။ “ကြက်သ္ပကဵုပယျၚ်ရ” ရဴဝွံ ဂၠာဲသ္ၚေဝ် ဂိုဏ်ကီု အ္စာဗြဴကီု သ္ၚာကီုမ္ဂး၊ သိမ်လေဝ်သၟိတ် (ထ္ၜုတ်) မ္ဂး၊ ဒးအာပတ်ဒုက္ကဋ်ရ။ ပ္ဍဲလအိတ် ဒးအာပတ်ဒုက္ကဋ်ရ၊ ပ္ဍဲလအိတ်ကမ္မဝါစ်ဂမၠိုၚ်ၜါဝါ ဒးအာပတ်ဒုက္ကဋ်ဂမၠိုၚ်အိုတ်ရ။ ပ္ဍဲလအိတ်ကမ္မဝါစ် ကုအ္စာဥပဇ္ၛာယ်ဂှ် ဒးအာပတ်ပဲါစိုတ်ရ၊ ကုဂိုဏ်ကီု ကုအ္စာဗြဴဂမၠိုၚ်ကီု ဒးအာပတ်ဒုက္ကဋ်ရ။

1144) ပ္ဍဲဓမ္မကမ် မၞုံကဵုစၟတ်သမ္တီ ဓမ္မကမ်ဒှ်တုဲ ပကဵုပယျၚ်မ္ဂး ဒးအာပတ်ပဲါစိုတ်ရ။ ပ္ဍဲဓမ္မကမ် မၞုံသၠေဟ်ပၟာဒှ်တုဲ ပကဵုပယျၚ်မ္ဂး ဒးအာပတ်ပဲါစိုတ်ရ။ ပ္ဍဲဓမ္မကမ် မၞုံကဵုစၟတ်သမ္တီ အဓမ္မကမ်ဒှ်တုဲ ပကဵုပယျၚ်မ္ဂး ဒးအာပတ်ပဲါစိုတ်ရ။ ပ္ဍဲအဓမ္မကမ် မၞုံကဵုစၟတ်သမ္တီ ဓမ္မကမ်မ္ဂး ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုသၠေဟ်ပၟာမ္ဂး ဒးအာပတ် ဒုက္ကဋ်ရ။ ပ္ဍဲအဓမ္မကမ် မၞုံကဵုစၟတ်သမ္တီ အဓမ္မကမ်မ္ဂး ဒးအာပတ်ဒုက္ကဋ်ရ။

1145) ပေၚ်စှ်ၜါဝှ်တုဲ ဟိုတ်နူသၚ်မသၟိတ်လဝ်ဂှ်ရ သ္ပကဵုခမဳမ္ဂး၊ ဟွံဒးအာပတ်ရ။ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ပဉ္စမတုဲရ။