၄.၈.၅။ သိက္ခာပိုဒ်ပဉ္စမ
1140) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ် ပေၚ်စှ်ၜါဝှ်ဟေၚ်တုဲ သီုသၚ်ဟွံသၟိတ်လဝ်ဏီ (သ္ပဥပဇ္ၛာယ်တုဲ) သ္ပကဵုခမဳအိုတ်ရ။ ခမဳဗြဴဂမၠိုၚ်ဂှ် ဓီုၜီုအိုတ်ရ၊ ဟွံစဳကၠးအိုတ်ရ၊ ဂပ်ဝ် ဟွံဂပ်ဝ်လေဝ် ဟွံတီအိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် ပေၚ်စှ်ၜါဝှ်ဟေၚ်တုဲ သီုသၚ်ဟွံသၟိတ်လဝ်ဏီ (သ္ပဥပဇ္ၛာယ်တုဲ) သ္ပကဵုခမဳအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ ။ “ယွံခမဳတအ် ခမဳဗြဴဂမၠိုၚ် ပေၚ်စှ်ၜါဝှ်ဟေၚ်တုဲ သီုသၚ်ဟွံသၟိတ်လဝ်ဏီ (သ္ပဥပဇ္ၛာယ်တုဲ) သ္ပကဵုခမဳအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် ပေၚ်စှ်ၜါဝှ်ဟေၚ်တုဲ သီုသၚ်ဟွံသၟိတ်လဝ်ဏီ (သ္ပဥပဇ္ၛာယ်တုဲ) သ္ပကဵုခမဳအိုတ်ရော? ယွံခမဳတအ် (ကမၠောန်ပွ ခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဂရိုဟ်တုဲ။ ပ ။ တွံကဵုဂလာန်ဓရ်တုဲမ္ဂး− “ယွံခမဳတအ် တၞဟ်နပွမကဵု ဝုဋ္ဌာပနသမ္မုတိ ‘ပွမသၟိတ်သွက်ဂွံသ္ပဥပဇ္ၛာယ်တုဲ ပကဵုပယျၚ်’ ကုခမဳဗြဴ မပေၚ်စှ်ၜါဝှ်တုဲဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံသ္ဒးကဵုရ၊ ခမဳဗြဴ မပေၚ်စှ်ၜါဝှ်တုဲဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလ္ပါ်တုဲ လ္ၚောဝ်ဒၠးဇိုၚ်ခမဳဗြဴဇၞော်ဂမၠိုၚ်တုဲမ္ဂး ဂဇအ်လံက်ဂဇုန်တုဲ သီုမပေၚ်ခၠအ်သၟိပ်တုဲဂှ်−− “ယွံနာဲဗြဴတအ် အဲဍိက် မပေၚ်စှ်ၜါဝှ်တုဲ မၞုံယၟုဝွံ အာတ်သၚ် ဝုဋ္ဌာပနသမ္မုတိရ” ရဴဝွံ သ္ဒးအာတ်ရ။ မရနုက်ကဵုၜါဝါလေဝ် သ္ဒးအာတ်ရ၊ မရနုက်ကဵုပိဝါလေဝ် သ္ဒးအာတ်ရ။ “ခမဳဗြဴဝွံ စဳကၠးဆိုက်ဗ္ဒက်ဟာ ဗြဴလဇ္ဇဳဟာ” ရဴဝွံ သၚ် သ္ဒးပိုၚ်ခြာ ခမဳဗြဴဂှ်ရ။ ယဝ် ဓီုလေဝ်ဓီုၜီုမ္ဂး၊ ဗြဴအလဇ္ဇဳလေဝ်ဒှ်မ္ဂး ကဵုဟွံဂွံရ။ ယဝ်ဓီုၜီုတုဲ ၜိုန်ဒှ်ဗြဴလဇ္ဇဳလေဝ် ကဵုဟွံဂွံရ။ ၜိုန်စဳကၠးဆိုက်ဗ္ဒက်လေဝ် ယဝ်ဒှ်ဗြဴအလဇ္ဇဳမ္ဂး ကဵုဟွံဂွံရ။ ယဝ်စဳကၠးဆိုက်ဗ္ဒက်လေဝ် စဳကၠးဆိုက်ဗ္ဒက်မ္ဂး ဗြဴလဇ္ဇဳလေဝ် ဒှ်မ္ဂး သ္ဒးကဵုရ။ ယွံခမဳတအ် ရဴဝွံ သ္ဒးကဵုရ၊ ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
1141) “ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴမၞုံယၟုဝွံ မပေၚ်စှ်ၜါဝှ်တုဲဂှ် အာတ်သၚ် ဝုဋ္ဌာပနသမ္မုတိရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ကဵုဝုဋ္ဌာပနသမ္မုတိ ကုခမဳဗြဴမၞုံယၟုဝွံ မပေၚ်စှ်ၜါဝှ်တုဲရ၊ ဣဝွံတုန် ပွမကဵုတီရောၚ်။ ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴမၞုံယၟုဝွံ မပေၚ်စှ်ၜါဝှ်တုဲဂှ် အာတ်သၚ် ဝုဋ္ဌာပနသမ္မုတိရ၊ သၚ် ကဵုဝုဋ္ဌာပနသမ္မုတိ ကုခမဳဗြဴယၟုဝွံ မပေၚ်စှ်ၜါဝှ်တုဲရ၊ ယြဴကုနာဲဗြဴမွဲ သ္ဍိုက်မၠိုက် ပွမကဵုဝုဋ္ဌာပနသမ္မုတိ ကုခမဳဗြဴမၞုံယၟုဝွံ မပေၚ်စှ်ၜါဝှ်တုဲရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။ သၚ် ဂပ်ဝ်ကဵုဝုဋ္ဌာပနသမ္မုတိ ကုခမဳဗြဴမၞုံယၟုဝွံ မပေၚ်စှ်ၜါဝှ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ်ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟီုဂရိုဟ်တၚ်ဒုဟ် ခမဳဗြဴဂမၠိုၚ် နဟိုတ်မဂၠိုၚ်ဂၠၚ်တုဲ ပွမဇြိုၚ်ကဵုလွဳမြိမြန်ဇကုဇကု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။ 1142) “ယြဴခမဳဗြဴမွဲ ပေၚ်စှ်ၜါဝှ်ဟေၚ်တုဲ သီုသၚ်ဟွံသၟိတ်လဝ်ဏီ (သ္ပဥပဇ္ၛာယ်တုဲ) သ္ပကဵုခမဳမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
