၄.၈.၄။ သိက္ခာပိုဒ်စတုတ္ထ

1136) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ် သီုဟွံပေၚ်စှ်ၜါဝှ်ဏီ (သ္ပဥပဇ္ၛာယ်တုဲ) သ္ပကဵုခမဳအိုတ်ရ။ ခမဳဂမၠိုၚ် ဓီုၜီုအိုတ်ရ။ ဟွံစဳကၠးအိုတ်ရ။ ဂပ်ဝ် ဟွံဂပ်ဝ်လေဝ် ဟွံတီအိုတ်ရ။ ကွးဗြဴ ပဒတဴမွဲစွံဂမၠိုၚ်လေဝ် ဓီုၜီုအိုတ်ရ၊ ဟွံစဳကၠးအိုတ်ရ၊ ဂပ်ဝ် ဟွံဂပ်ဝ်လေဝ် ဟွံတီအိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် သီုဟွံပေၚ်စှ်ၜါဝှ်ဏီ (သ္ပဥပဇ္ၛာယ်တုဲ) သ္ပကဵုခမဳအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ ။ “ယွံခမဳတအ် ခမဳဗြဴဂမၠိုၚ် သီုဟွံပေၚ်စှ်ၜါဝှ်ဏီ (သ္ပဥပဇ္ၛာယ်တုဲ) သ္ပကဵုခမဳအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် သီုဟွံပေၚ်စှ်ၜါဝှ်ဏီ (သ္ပဥပဇ္ၛာယ်တုဲ) သ္ပကဵုခမဳအိုတ်ရော? ယွံခမဳတအ် (ကမၠောန်ပွ ခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် သြဝ်ကဵုခမဳဂမၠိုၚ် စၞောန်ထ္ၜး သိက္ခာပိုဒ်ဝွံအိုတ်ညိ။

1137) “ယြဴခမဳဗြဴမွဲ သီုဟွံပေၚ်စှ်ၜါဝှ်ဏီ (သ္ပဥပဇ္ၛာယ်တုဲ) သ္ပကဵုခမဳမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (သြဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။