၄.၈.၂.၁။ ပွံက်သိက္ခာပိုဒ်ဒုတိယ

1127) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳဗြဴရ။ ပေၚ်အာယုက်ၜါစှော်သၞာံတုဲ မ္ဂးဂှ် မအာစိုပ်အာယုက်ၜါစှော်သၞာံတုဲရောၚ်။ မစိုန်ဒှ်သၟတ်ဝုတ် မ္ဂးဂှ် သ္ဂးတဴ သာမဏဳဗြဴရ။ လုကဴၜါသၞာံဂမၠိုၚ် မ္ဂးဂှ် လုကဴကာလအပိုၚ်အခြာ ၜါသၞာံဂမၠိုၚ်။ မဟဂွံဒ္ဂေတ်လဝ် မ္ဂးဂှ် ‘သိက္ခာ’ ဒ္ဂေတ်လေဝ် ဟဂွံကဵုဏီရ၊ ‘သိက္ခာ’ ဒ္ဂေတ်ကဵုလဝ်တုဲလေဝ် လီုလာ်ရ။ သ္ပကဵုခမဳ မ္ဂးဂှ် ဒုၚ်ကဵုပယျၚ်မ္ဂး။ “ကြက်သ္ပကဵုပယျၚ်ရ” ရဴဝွံ ဂၠာဲသ္ၚေဝ် ဂိုဏ်ကီု အ္စာဗြဴကီု ဗဗေၚ်ကီု သ္ၚာကီုမ္ဂး၊ သိမ်လေဝ်သၟိတ် (ထ္ၜုတ်) မ္ဂး ဒးအာပတ်ဒုက္ကဋ်ရ။ ပ္ဍဲလအိတ်ဉတ် ဒးအာပတ်ဒုက္ကဋ်ရ၊ ပ္ဍဲလအိတ်ကမ္မဝါစ်ဂမၠိုၚ်ၜါဝါ ဒးအာပတ်ဒုက္ကဋ်ဂမၠိုၚ်အိုတ်ရ။ ပ္ဍဲလအိတ်ကမ္မဝါစ် ကုအ္စာဥပဇ္ၛာယ်ဂှ် ဒးအာပတ်ပဲါစိုတ်ရ၊ ကုဂိုဏ်ကီု ကုအ္စာဗြဴဂမၠိုၚ်ကီု ဒးအာပတ်ဒုက္ကဋ်ရ။

1128) ပ္ဍဲဓမ္မကမ် မၞုံစၟတ်သမ္တီ ဓမ္မကမ်ဒှ်တုဲ ပကဵုပယျၚ်မ္ဂး၊ ဒးအာပတ်ပဲါစိုတ်ရ။ ပ္ဍဲဓမ္မကမ် မၞုံသၠေဟ်ပၟာဒှ်တုဲ ပကဵုပယျၚ်မ္ဂး၊ ဒးအာပတ်ပဲါစိုတ်ရ။ ပ္ဍဲဓမ္မကမ် မၞုံစၟတ်သမ္တီ အဓမ္မကမ်ဒှ်တုဲ ပကဵုပယျၚ်မ္ဂး၊ ဒးအာပတ်ပဲါစိုတ်ရ။ ပ္ဍဲအဓမ္မကမ် မၞုံကဵုစၟတ်သမ္တီ ဓမ္မကမ်မ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုစၟတ်သမ္တီ အဓမ္မကမ်မ္ဂး၊ ဒးအာပတ်ဒုက္ကဋ်ရ။

1129) သ္ပကဵုခမဳ သာမဏဳဗြဴ မစိုန်ဒှ်သၟတ်ဝုတ် ပေၚ်အာယုက်ၜါစှော်သၞာံတုဲ မၞုံကဵုသိက္ခာ မဒ္ဂေတ်လဝ် ပ္ဍဲသိက္ခာပိုဒ်တြဴပြကာ လုကဴၜါသၞာံဂမၠိုၚ်တုဲမ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။

သိက္ခာပိုဒ် ဒုတိယ တုဲရ။