၄.၈.၂။ သိက္ခာပိုဒ်ဒုတိယ
1124) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇတေဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာဝှ်ဂှ် ခမဳဗြဴဂမၠိုၚ် သ္ပကဵုခမဳ သာမဏဳဗြဴမစိုန်ဒှ်သၟတ်ဝုတ် ပေၚ်အာယုက်ၜါစှော်သၞာံတုဲ မၞုံကဵုသိက္ခာ မဟဂွံဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်အိုတ်ရ။ ခမဳဗြဴဂမၠိုၚ်ဂှ် ဓီုၜီုအိုတ်ရ၊ ဟွံစဳကၠးအိုတ်ရ၊ ဂပ်ဝ် ဟွံဂပ်ဝ်လေဝ် ဟွံတီအိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် သ္ပကဵုခမဳ သာမဏဳဗြဴမစိုန်ဒှ်သၟတ်ဝုတ် ပေၚ်အာယုက်ၜါစှော်သၞာံတုဲ မၞုံကဵုသိက္ခာ မဟဂွံဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်အိုတ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳဗြဴတအ် ခမဳဗြဴဂမၠိုၚ် သ္ပကဵုခမဳ သာမဏဳဗြဴမစိုန်ဒှ်သၟတ်ဝုတ် ပေၚ်အာယုက်ၜါစှော်သၞာံတုဲ မၞုံကဵုသိက္ခာ မဟဂွံဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် သ္ပကဵုခမဳ သာမဏဳဗြဴမစိုန်ဒှ်သၟတ်ဝုတ် ပေၚ်အာယုက်ၜါစှော်သၞာံတုဲ မၞုံကဵုသိက္ခာ မဟဂွံဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံ ဂမၠိုၚ်အိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး−− “ယွံခမဳတအ် တၞဟ်နပွမကဵုသိက္ခာသမ္မုတိ မတွံဂးသွက်ဂွံဒ္ဂေတ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ် ကုသာမဏဳဗြဴမစိုန်ဒှ်သၟတ်ဝုတ် ပေၚ်အာယုက်စှ်ဒ္စာံသၞာံတုဲဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံ သ္ဒးကဵုရ၊ သာမဏဳဗြဴမစိုန်ဒှ်သၟတ်ဝုတ်ပေၚ်အာယုက်စှ်ဒ္စာံသၞာံတုဲဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပဲါမွဲလပါ်တုဲ လ္ၚောဝ်ဂၠးဇိုၚ်ခမဳဗြဴဂမၠိုၚ်တုဲမ္ဂး ဂဇအ်လံက်ဂဇုန်တုဲ သီုမပၚ်ခၠအ်သၟိပ်တဲဂှ်-- “ယွံနာဲဗြဴတအ် အဲဍိက် မၞုံယၟုရဴဝွံရ၊ ဒှ်သာမဏဳဗြဴမစိုန်ဒှ်သၟတ်ဝုတ် ပေၚ်အာယုက်စှ်ဒ္စာံသၞာံတုဲ နာဲဗြဴမၞုံယၟုဝွံရ၊ အဲဍိက်အာတ်သၚ် သိက္ခာသမ္မုတိ မတွံဂးသွက်ဂွံဒ္ဂေတ် ပ္ဍဲသိက္ခာဂမၠိုၚ်တြဴပြကာ လုကဴၜါသၞာံဂမၠိုၚ်ရ” ရဴဝွံ သ္ဒးဂရၚ်ပတီရ။ မရနုက်ကဵုၜါဝါလေဝ် သ္ဒးဂရၚ်ပတီရ၊ မရနုက်ကဵုပိဝါလေဝ် သ္ဒးဂရၚ်ပတီရ၊ ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
1125) “ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သာမဏဳဗြဴမစိုန်ဒှ်သၟဝ်ဝုတ် ပေၚ်အာယုက်စှ်ဒ္စာံသၞာံတုဲ မၞုံယၟုဝွံ ဒဒက်တဴနာဲဗြဴမၞုံယၟုဝွံ အာတ်သၚ်သိက္ခာသမ္မုတိ မတွံဂးသွက်ဂွံဒ္ဂေတ် ပ္ဍဲသိက္ခာပိုဒ်ဂမၠိုၚ် လုကဴၜါသၞာံဂမၠိုၚ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသိက္ခာသမ္မုတိ မတွံဂးသွက်ဂွံဒ္ဂေတ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ် ကုသာမဏဳဗြဴမစိုန်ဒှ်သၟတ်ဝုတ် ပေၚ်အာယုက်စှ်ဒ္စာံသၞာံတုဲ မၞုံယၟုဝွံရ၊ ဣဝွံတုန် ပွမကဵုတီရောၚ်။ ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သာမဏဳဗြဴမစိုန်ဒှ်သၟတ်ဝုတ် ပေၚ်အာယုက်စှ်ဒ္စာံသၞာံတုဲ မၞုံယၟုဝွံ ဒဒက်တဴနာဲဗြဴမၞုံယၟုဝွံ အာတ်သၚ် သိက္ခာသမ္မုတိ မတွံဂးသွက်ဂွံဒ္ဂေတ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်ရ၊ သၚ် ကဵုသိက္ခာသမ္မုတိ မတွံဂးသွက်ဂွံဒ္ဂေတ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ် ကုသာမဏဳဗြဴမစိုန်ဒှ်သၟတ်ဝုတ် ပေၚ်အာယုက်စှ်ဒ္စာံသၞာံတုဲ မၞုံယၟုဝွံရ၊ ယြဴကုနာဲဗြဴမွဲ သ္ဍိုက်မၠိုက် ပွမကဵုသိက္ခာသမ္မုတိ မတွံဂး သွက်ဂွံဒ္ဂေတ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ် ကုသာမဏဳဗြဴမစိုန်ဒှ်သၟတ်ဝုတ် ပေၚ်အာယုက်စှ်ဒ္စာံသၞာံတုဲမၞုံယၟုဝွံရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။ သၚ် ဂပ်ဝ်ကဵုသိက္ခာသမ္မုတိ မတွံဂးသွက်ဂွံဒ္ဂေတ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ် ကုသာမဏဳဗြဴမစိုန်ဒှ်သၟတ်ဝုတ် ပေၚ်အာယုက်စှ်ဒ္စာံသၞာံတုဲ မၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။ သာမဏဳဗြဴမစိုန်ဒှ်သၟတ်ဝုတ် ပေၚ်အာယုက်စှ်ဒ္စာံသၞာံတုဲဂှ် (၁) “သိက္ခာပိုဒ်မဒှ်ဟိုတ်ဝေၚ်ပဲါကၠေံ နူပွမဂစိုတ်လမျီုဂှ် လုကဴၜါသၞာံဂမၠိုၚ် ညံၚ်ဟဂွံကလိလောန်ဒး ဒဂိုန်ဒ္ဂေတ်ရ ။ ပ ။ (၆) သိက္ခာပိုဒ်မဒှ်ဝေၚ်ပဲါကၠေံ နူပွမစ ပ္ဍဲကာလတ္ၚဲမစေၚ်ဂှ် လုကဴၜါသၞာံဂမၠိုၚ် ညံၚ်ဟဂွံကလိလောန်ဒး ဒးဒဂိုန်ဒ္ဂေတ်ရ” ရဴဝွံ ဩဝ်ဟီုညိရဴဝွံ ဒးဟီုရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟီုဂရိုဟ်တၚ်ဒုဟ် ခမဳဗြဴဂမၠိုၚ် နဟိုတ်မဂၠိုၚ်ဂၠၚ်တုဲ ပွမဇြိုၚ်ကဵုလွဳမြိမြန်ဇကုဇကု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
1126) “ယြဴခမဳဗြဴမွဲ သ္ပကဵုခမဳ သာမဏဳဗြဴမစိုန်ဒှ်သၟတ်ဝုတ် ပေၚ်အာယုက်ၜါစှော်သၞာံတုဲ မၞုံကဵုသိက္ခာ မဟဂွံဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
