၄.၈.၁၂။ သိက္ခာပိုဒ်တေရသမ

1174) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ် ပ္ဍဲမွဲသၞာံဓဝ် သ္ပကဵုခမဳ သိက္ခမာန်ဂမၠိုၚ်ၜါအိုတ်ရ။ ဘာဒၞဲါဒၟံၚ် တုပ်သၟဟ်ကိုပ်ကၠာဂှ်ဟေၚ် ဟွံရုမ်ဂပ်ဒှ်ရ။ မၞိဟ်ဂမၠိုၚ် “မုဟိုတ် ခမဳဗြဴဂမၠိုၚ် ပ္ဍဲမွဲသၞာံဓဝ် သ္ပကဵုခမဳ သိက္ခမာန်ဂမၠိုၚ်ၜါအိုတ်ရော? ဘာဒၞဲါဒၟံၚ် တုပ်သၟဟ်ကိုပ်ကၠာဂှ်ဟေၚ် ဟွံရုမ်ဂပ်ဒှ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် ပ္ဍဲမွဲသၞာံဓဝ် သ္ပကဵုခမဳ သိက္ခမာန်ဂမၠိုၚ်ၜါအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် ပ္ဍဲမွဲသၞာံဓဝ် သ္ပကဵုခမဳသိက္ခမာန်ဂမၠိုၚ်ၜါအိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1175) “ယြဴခမဳဗြဴမွဲ ပ္ဍဲမွဲသၞာံဓဝ် သ္ပကဵုခမဳ သိက္ခမာန်ဂမၠိုၚ်ၜါမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။