၄.၈.၁။ သိက္ခာပိုဒ်ပဌမ
1119) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရ၀ှ်ဂှ် ခမဳဗြဴဂမၠိုၚ် သ္ပကဵုခမဳ သာမဏဳ ဗြဴမစိုန်ဒှ် သၟတ်ဝုတ်မဟွံပေၚ်အာယုက်ၜါစှော်သၞာံ ဏီအိုတ်ရ။ သာမဏဳဗြဴဂမၠိုၚ် အေၚ်ဒုၚ်ပရိုက်ၜိုဟ် ပရိုက်ဂမ္တဴ ပွမဗျဵုတဟၚ် ပွမထၚ် တၟတ်ဒွံ ဂမိတ် ရုဲပၠာ, ဇၚ်ရာဲ, ကျာ, ဂမ္တဴတ္ၚဲ, ဇြုံဂဂဳအယဴဂမၠိုၚ် ဟွံမာန်အိုတ်ရ၊ ဒှ်ညးမၞုံသဘဴ ပွမအေၚ်ဒုၚ်ဂလာန်ဂမၠိုၚ် မဂပ်ဝ်သ္ဂး ဗွဲဟွံဒးရး မကၠုၚ်စိုပ် ဗွဲဟွံဒးရးကီု ဒဒိုခ်ဝေဒနာဂမၠိုၚ် မဒှ်ဃောမကတဵုဒှ် ပ္ဍဲဇကု မသကာတ်မြဟ်ကြမ်ကြ မရိၚ်ကတၚ်ဂိသကဝ် မဟွံသာယျေန် မဟွံထေက်ကဵုသ္ဍိုက်မၠိုက် မရၚ်တၠုၚ်ဏာလမျီုကီု ဟွံမာန်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် သ္ပကဵုခမဳ သာမဏဳဗြဴ မစိုန်ဒှ်သၟတ်ဝုတ် မဟွံပေၚ်အာယုက်ၜါစှော်သၞာံဏီအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ ။ “ယွံခမဳတအ် ခမဳဗြဴဂမၠိုၚ် သ္ပကဵုခမဳ သာမဏဳဗြဴမစိုန်ဒှ်သၟတ်ဝုတ် မဟွံပေၚ်အာယုက်ၜါစှော်သၞာံဏီအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် သ္ပကဵုခမဳ သာမဏဳဗြဴမစိုန်ဒှ်သၟတ်ဝုတ် မဟွံပေၚ်အာယုက်ၜါစှော်သၞာံအိုတ်ရော? ယွံခမဳတအ် သာမဏဳဗြဴမစိုန်ဒှ်သၟတ်ဝုတ် မဟွံပေၚ်အာယုက် ၜါစှော်သၞာံဏီဂှ် အေၚ်ဒုၚ်ပရိုဟ်ၜိုဟ် ပရိုက်ဂမ္တဴ ဟွံမာန်ရ။ ပ ။ ဒှ်ညးမၞုံသဘဴ ပွမအေၚ်ဒုၚ် ။ ပ ။ ဒဒိုက်ဝေဒနာဂမၠိုၚ် မရေၚ်တၠုၚ်ဏာလမျီုကီု ဟွံမာန်ရ။ ယွံခမဳတအ် သာမဏဳဗြဴမစိုန်ဒှ်သၟတ်ဝုတ် မပေၚ်အာယုက်ၜါစှော်သၞာံတုဲဂှ်ဟေၚ် အေၚ်ဒုၚ်ပရိုဟ်ၜိုဟ် ပရိုက်ဂမ္တဴမာန်ရ ။ ပ ။ ဒှ်ညးမၞုံသဘဴ ပွမအေၚ်ဒုၚ် ။ ပ ။ ဒဒိုက်ဝေဒနာဂမၠိုၚ် မရၚ်တၠၚ်ဏာလမျီုကီုမာန်ရ။ ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
1120) “ယြဴခမဳဗြဴမွဲ သ္ပကဵုခမဳ သာမဏဳဗြဴမစိုန်ဒှ်သၟဝ်ဝုတ် မဟွံပေၚ်အာယုက်ၜါစှော်သၞာံဏီမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
