၄.၇.၈။ သိက္ခာပိုဒ်အဋ္ဌမ

1107) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ သ္ပကဵုခမဳ ကွးဗြဴပဒတဴမွဲစွံတုဲ လုကဴၜါသၞာံဂမၠိုၚ် အလဵုဇကုလေဝ် ဟွံယိုက်ဒိုက်ရ၊ ညးသအာၚ်လေဝ် ဟွံဖအောဝ်ကဵုယိုက်ဒိုက်ရ။ ခမဳဗြဴဂမၠိုၚ်ဂှ် ဓီုၜီုအိုတ်ရ၊ ဟွံစဳကၠးအိုတ်ရ၊ ဂပ်ဝ်ဟွံဂပ်ဝ်လေဝ် ဟွံတီအိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ သ္ပကဵုခမဳ ကွးဗြဴပဒတဴမွဲစွံတုဲ လုကဴၜါသၞာံဂမၠိုၚ် အလဵုဇကုလေဝ် ဟွံယိုက်ဒိုက်ရော? ညးသအာၚ်လေဝ် ဟွံဖအောဝ်ကဵုယိုက်ဒိုက်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ သ္ပကဵုခမဳ ကွးဗြဴပဒတဴမွဲစွံတုဲ လုကဴၜါသၞာံဂမၠိုၚ် အလဵုဇကုလေဝ် ဟွံယိုက်ဒိုက်ရ၊ ညးသအာၚ်လေဝ် ဟွံဖအောဝ်ကဵုယိုက်ဒိုက်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ သ္ပကဵုခမဳ ကွးဗြဴပဒတဴမွဲစွံတုဲ လုကဴၜါသၞာံဂမၠိုၚ် အလဵုဇကုလေဝ် ဟွံယိုက်ဒိုက်ရော? ညးသအာၚ်လေဝ် ဟွံဖအောဝ်ကဵုယိုက်ဒိုက်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1108) “ယြဴခမဳဗြဴမွဲ သ္ပကဵုခမဳ ကွးဗြဴပဒတဴမွဲစွံတုဲ လုကဴၜါသၞာံဂမၠိုၚ် (အလဵုဇကုလေဝ်) ဟွံယိုက်ဒိုက်မ္ဂး၊ (ညးသအာၚ်လေဝ်) ဟွံဖအောဝ်ကဵုယိုက်ဒိုက်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။