၄.၇.၇။ သိက္ခာပိုဒ်သတ္တမ
1101) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ် သ္ပကဵုခမဳ ဗြဴပေၚ်အာယုက်စှ်ၜါသၞာံတုဲ မကေၚ်ဂွံတြုံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲဒှ်တုဲ သၚ်မဟဂွံသၟိတ်လဝ်ဏီအိုတ်ရ။ ခမဳဗြဴဂမၠိုၚ် “ယွံသိက္ခမာန်တအ် ဩဝ်ကၠုၚ်အိုတ်ညိ၊ ဩဝ်တီဝတ် ဝတ္ထုဝွံအိုတ်ညိ၊ ဩဝ်ကဵုဝတ္ထုဝွံအိုတ်ညိ၊ ဩဝ်ရၚ်တၠုၚ်နၚ် ဝတ္ထုဝွံအိုတ်ညိ၊ နွံပၟိက်ကဵုဝတ္ထုဝွံရ၊ ဩဝ်သ္ပဝတ္ထုဝွံ ညံၚ်ဂွံဂပ်ဝ်ညိ” ရဴဝွံ သ္ဂးအိုတ်ရ။ ဗြဴဂမၠိုၚ်ဂှ် “ယွံနာဲဗြဴတအ် ပိုဲဍိက်တအ်ညးဂမၠိုၚ် ခမဳဗြဴဂမၠိုၚ်ရောၚ်” ရဴဝွံ ဟီုသ္ဂးအိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် သ္ပကဵုခမဳ ဗြဴပေၚ်အာယုက်စှ်ၜါသၞာံတုဲ မကေၚ်ဂွံတြုံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲ သၚ်မဟဂွံသၟိတ်လဝ်ဏီအိုတ်ရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် သ္ပကဵုခမဳ ဗြဴပေၚ်အာယုက်စှ်ၜါသၞာံတုဲ မကေၚ်ဂွံတြုံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲ သၚ်မဟဂွံသၟိတ်လဝ်ဏီအိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် သ္ပကဵုခမဳ ဗြဴပေၚ်အာယုက်စှ်ၜါသၞာံတုဲ မကေၚ်ဂွံတြုံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲ သၚ်မဟဂွံသၟိတ်လဝ်ဏီအိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး− “ယွံခမဳတအ် တၞဟ်နပွမကဵုသမ္မုတိ သွက်ဂွံသ္ပခမဳ သိက္ခမာန်ပေၚ်အာယုက်စှ်ၜါသၞာံတုဲ မကေၚ်ဂွံတြုံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံ သ္ဒးကဵုရ၊ သိက္ခမာန် ပေၚ်အာယုက်စှ်ၜါသၞာံတုဲဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပဲါမွဲလပါ်တုဲ လ္ၚောဝ်ဒၠးဇိုၚ်ခမဳဗြဴဂမၠိုၚ်တုဲမ္ဂး ဂဇအ်လံက်ဂဇုန်တုဲ သီုမပၚ်ခၠအ်သၟိပ်တဲဂှ်− “ယွံနာဲဗြဴတအ် အဲဍိက် မၞုံယၟုရဴဝွံရ၊ ဒှ်သိက္ခမာန် ပေၚ်အာယုက်စှ်ၜါသၞာံတုဲ မကေၚ်ဂွံတြုံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲ နာဲဗြဴမၞုံယၟုဝွံရ၊ အဲဍိက်အာတ်သၚ် ကဵုဝုဋ္ဌာနသမ္မုတိ ‘ပွမသၟိတ်သွက်ဂွံသ္ပပယျၚ်’ ရ” ရဴဝွံ သ္ဂးဂရၚ်ပတီရ။ မရနုက်ကဵုၜါဝါလေဝ် သ္ဒးဂရၚ်ပတီရ၊ မရနုက်ကဵုပိဝါလေဝ် သ္ဒးဂရၚ်ပတီရ၊ ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
1102) “ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သိက္ခမာန် ပေၚ်အာယုက်စှ်ၜါသၞာံတုဲ မကေၚ်ဂွံတြုံမၞုံယၟုဝွံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲ ဒဒက်တဴနာဲဗြဴမၞုံယၟုဝွံ အာတ်သၚ် ကဵုဝုဋ္ဌာနသမ္မုတိ ‘ပွမသၟိတ် သွက်ဂွံ သ္ပပယျၚ်’ ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ကဵုဝုဋ္ဌာနသမ္မုတိ ‘ပွမသၟိတ် သွက်ဂွံ သ္ပပယျၚ်’ ကုသိက္ခမာန် ပေၚ်အာယုက်စှ်ၜါသၞာံတုဲ မကေၚ်ဂွံတြုံမၞုံယၟုဝွံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲရ၊ ဣဝွံတုန် ပွမကဵုတီရောၚ်။ ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သိက္ခမာန် ပေၚ်အာယုက်စှ်ၜါသၞာံတုဲ မကေၚ်ဂွံတြုံမၞုံယၟုဝွံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲ ဒဒက်တဴနာဲဗြဴမၞုံယၟုဝွံ အာတ်သၚ် ဝုဋ္ဌာနသမ္မုတိရ၊ သၚ် ကဵုဝုဋ္ဌာနသမ္မုတိ ကုသိက္ခမာန် ပေၚ်အာယုက်စှ်ၜါသၞာံတုဲ မကေၚ်ဂွံတြုံမၞုံယၟုဝွံ မၞုံကဵုသိက္ခာမဒ္ဂေဝ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲရ၊ ယြဴကုနာဲဗြဴမွဲ သ္ဍိုက်မၠိုက် ပွမကဵုဝုဋ္ဌာနသမ္မုတိ သိက္ခမာန် ပေၚ်အာယုက်စှ်ၜါသၞာံတုဲ မကေၚ်ဂွံတြုံမၞုံယၟုဝွံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။ သၚ် ဂပ်ဝ်ကဵုဝုဋ္ဌာနသမ္မုတိ ကုသိက္ခမာန် ပေၚ်အာယုက်စှ်ၜါသၞာံတုဲ မကေၚ်ဂွံတြုံမၞုံယၟုဝွံ မၞုံကဵုသိက္ခာမဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ(သ္ဒးကဵုတီရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟီုဂရိုဟ်တၚ်ဒုဟ် ခမဳဗြဴဂမၠိုၚ် နဟိုတ်မဂၠိုၚ်ဂၠၚ်တုဲ ပွမဇြိုၚ်ကဵုလွဳမြိမြန်ဇကုဇကု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
1103) “ယြဴခမဳဗြဴမွဲ သ္ပကဵုခမဳ သိက္ခမာန် ပေၚ်အာယုက်စှ်ၜါသၞာံတုဲ မကေၚ်ဂွံတြုံမၞုံကဵုသိက္ခာ မဟဂွံဒ္ဂေတ်လဝ် ပ္ဍဲသိက္ခာပိုဒ်ဂမၠိုၚ်တြဴပြကာ လုကဴၜါသၞာံဂမၠိုၚ် သၚ်မဟဂွံသၟိတ်လဝ်ဏီမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွဴ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
