၄.၆.၉။ သိက္ခာပိုဒ်နဝမ

1058) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ်ဗွဲမဂၠိုၚ် ဥပေါသ်လေဝ် ဟွံသၟာန်အိုတ်ရ၊ ဒၠောံဗတောန်လေဝ် ဟွံအာတ်အိုတ်ရ။ ခမဳဂမၠိုၚ် “မုဟိုတ် ခမဳဗြဴဂမၠိုၚ် တ္ၚဲဥပေါသ်လေဝ် ဟွံသၟာန်အိုတ်ရော? ဒၠောံဗတောန်လေဝ် ဟွံအာတ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် တ္ၚဲဥပေါသ်လေဝ် ဟွံသၟာန်အိုတ်ရ၊ ဒၠောံဗတောန်လေဝ် ဟွံအာတ်အိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် တ္ၚဲဥပေါသ်လေဝ် ဟွံသၟာန်အိုတ်ရော? ဒၠောံဗတောန်လေဝ် ဟွံအာတ်အိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1059) “လပါ်ဂိတုမွဲဝါ ပွမသၟာန်တ္ၚဲဥပေါသ်ကီု ပွမပြာပ်အာအာတ် သွက်ဂွံဒုၚ်ဂိုၚ်ကေတ် ဒၠောံဗတောန်ကီု ဓရ်ဂမၠိုၚ်ၜါဝွံ ခမဳဗြဴဂှ် ဂပ်ဝ်ဒးရာဒနာ နူခမဳသၚ်ရ၊ ကုခမဳဗြဴ မကဵုကလိလောန်အာယ လပါ်ဂိတုမွဲဝါဂှ် ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။