၄.၆.၆.၁။ ပွံက်သိက္ခာပိုဒ်ဆဋ္ဌ
1048) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ ဘာဟွံမွဲကဵုခမဳ မ္ဂးဂှ် တၞဟ်နဒုၚ်ဒၠောံဗတောန်ကီု တၞဟ်နဖဵုသံဝါသမပ္တံပွမသၟာန်ဥပေါသ် သွက်ဂွံအာ ဟွံသၟဟ်ရထရ။ “ကြက်ပြာပ်လုပ်ဒဂိုန်ရ” ရဴဝွံ ပၠုပ်စိုတ်တုဲ လးတဴသၞာသတိက်သၞာဒၟံၚ်မ္ဂး၊ စွံပတန် ဍာ်သုၚ်ဍာ်ရပ်စပ်မ္ဂး၊ ကွဟ်ၚးတး ပြဝိုဏ်မ္ဂး၊ ဒးအာပတ်ဒုက္ကဋ်ရ၊ မွဲဒမြိပ်ကေုာံအရှိုဏ်တိုန်ဂှ် ဒးအာပတ်ပဲါစိုတ်ရ။
1049) ခမဳဗြဴလုပ်ဒဂိုန်တုဲမှ ခမဳဂမၠိုၚ် စ္ဍးအာဌာန်သအာၚ်အိုတ်မ္ဂး၊ ရာမ်တိတ်ခရှ်အိုတ်မ္ဂး၊ ချိုတ်အာအိုတ်မ္ဂး၊ ပြံၚ်အာပဒတဴဘာတဳအိုတ်မ္ဂး၊ ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ်လေဝ် ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ဆဋ္ဌတုရ။
===၄.၆.၇။ သိက္ခာပိုဒ်သတ္တမ 1050) ပ္ဍဲအခိၚ်တဳလမၞုံပိုဉ်ကျာတြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ်ဗွဲမဂၠိုၚ် ဒၠိုက်ကတဵုနူဝသ် ပ္ဍဲဘာကွာန်အိုတ်တုဲ ပ္ဍဲကြဴ က္ညအာဍုၚ်သာရဝှ်အိုတ်ရ။ ခမဳဗြဴဂမၠိုၚ်ဂှ် “နာဲဗြဴတအ်ညးဂမၠိုၚ် မုရဴပ္ဍဲကွာန်ပ္ဍဲမွဲ ဒၠိုက်ကတဵုနူဝသ်အိုတ်ရော? ဘိက်နိမန်ခမဳသၚ်တုဲရဟာ” ရဴဝွံ သၟာန်တဴခမဳဗြဴဂမၠိုၚ်ဂှ်ရ ယွံနာဲဗြဴ ပိုဲဍိက်တအ်ညးဂမၠိုၚ် ဟဂွံဘိက်နိမန်ခမဳသၚ်အိုတ်ရ ရဴဝွံ ဟီုသ္ဂးအိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် ဒၠိုက်ကတဵုနူဝသ်တုဲအိုတ်မ္ဂး ဟွံဘိက်နိမန် ခမဳသၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် ဒၠိုက်ကတဵုနူဝသ်တုဲမ္ဂး ဟွံဘိက်နိမန် ခမဳသၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် ဒၠိုက်ကတဵုနူဝသ်တုဲမ္ဂး ဟွံဘိက်နိမန်ခမဳသၚ်အိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
1051) “ယြဴခမဳဗြဴမွဲ ဒၠိုက်ကတဵုနူဝသ်မ္ဂး ပွမညာတ် ပွမမိၚ် ပွမသၠေဟ်ပၟာ နဟိုတ်ဂမၠိုၚ်ပိသာ်ဝွံ ဟွံဘိက်နိမန် ပ္ဍဲသၚ်ၜါလပါ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
