၄.၆.၆။ သိက္ခာပိုဒ်ဆဋ္ဌ

1046) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ်ဗွဲမဂၠိုၚ် ဒၠိုက်ကတဵုနူဝှ် ပ္ဍဲဘာကွာန်အိုတ်တုဲ ပ္ဍဲကြဴ က္ညအာဍုၚ်သာရဝှ်အိုတ်ရ။ ခမဳဗြဴဂမၠိုၚ်ဂှ် “နာဲဗြဴတအ်ညးဂမၠိုၚ် မုရဴပ္ဍဲဌာန်ပ္ဍဲမွဲ ဒၠိုက်ကတဵုနူဝှ်အိုတ်ရော? ဩဝါဒဒၠောံဗတောန် ဍိုက်ပေၚ်ကီုဟာ” ရဴဝွံ သၟာန်တဴခမဳဗြဴဂမၠိုၚ်ဂှ်အိုတ်ရ။ ယွံနာဲဗြဴတအ် ပ္ဍဲဌာန်ဂှ် ခမဳဂမၠိုၚ် ဟွံမွဲအိုတ်ရ၊ ပသာ်လဵု ဒၠောံဗတောန်ဂွံဍိုက်ပေၚ်ရော? ရဴဝွံ (သ္ဂးအိုတ်ရ)။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် ပြာပ်လုပ်ဒဂိုန် ပ္ဍဲဘာဟွံမွဲကဵုခမဳအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် ပြာပ်လုပ်ဒဂိုန် ပ္ဍဲဘာဟွံမွဲကဵုခမဳအိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် ပြာပ်လုပ်ဒဂိုန် ပ္ဍဲဘာဟွံမွဲကဵုခမဳအိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1047) “ယြဴခမဳဗြဴမွဲ ပြာပ်လုပ်ဒဂိုန် ပ္ဍဲဘာဟွံမွဲကဵုခမဳ (အပ္ဍဲကဝက်ယောဇနာ) မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။