၄.၆.၅။ သိက္ခာပိုဒ်ပဉ္စမ

1042) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴမွဲဇကု ဂေတ်ဂ္ၚေၚ်တၞဟ်နပိဏ္ဍပါတ် ပ္ဍဲဂၠံၚ်တရဴသွာၚ်မွဲ အပ္ဍဲဍုၚ်သာရဝှ်မ္ဂး ပြာပ်စိုပ်အာသ္ၚိ ဒကာမွဲတၠတုဲမ္ဂး ဂဇအ်ဒၟံၚ်ပ္ဍဲသၞာမလးပညပ်လဝ်ရ။ ပ္ဍဲအခိၚ်ဂှ် မၞိဟ်ဂမၠိုၚ် တရာပ်ဖာပ်ဗ္စပိဏ္ဍပါတ်ကဵုခမဳဗြဴဂှ်တုဲမ္ဂး “ယွံနာဲဗြဴ ခမဳဗြဴသအာၚ်ဂမၠိုၚ်လေဝ် ဩဝ်ကဵုက္ညကၠုၚ်အိုတ်ညိ” ရဴဝွံ ဟီုသ္ဂးအိုတ်ရ။ ပ္ဍဲအခိၚ်ဂှ် ခမဳဗြဴဂှ် “မုရဴသာ်လဵု ခမဳဗြဴသအာၚ်ဂမၠိုၚ် ဟွံက္ညကၠုၚ်အိုတ်ရော?” ရဴဝွံ (ချပ်တုဲ) ပြာပ်အာဇရေၚ် ခမဳဗြဴဂမၠိုၚ်တုဲ “ယွံနာဲဗြဴတအ် ပ္ဍဲဌာန်မၞုံယၟုဝွံ ကၠဵုဂမၠိုၚ် ကြမ်ကြအိုတ်ရ၊ ဂၠဴကြိုတ် ကြမ်ကြရ၊ ဌာန်လှိုက်သရီုဂၠိုၚ်လေဝ် ဒှ်ရ၊ လ္ပအာဌာန်ဂှ်အိုတ်ညိ” ရဴဝွံ (ဟီုသ္ဂးရ)။ ခမဳဗြဴမွဲဇကုလေဝ် ပ္ဍဲဂၠံၚ်တရဴသွာၚ်ဂှ်လေဝ် ဂေတ်ဂ္ၚေၚ်ပိဏ္ဍပါတ်မ္ဂး ပြာပ်စိုပ်အာသ္ၚိဒကာဂှ်တုဲမ္ဂး ဂဇအ်ဒၟံၚ်ပ္ဍဲသၞာမလးပညပ်လဝ်ရ။ ပ္ဍဲအခိၚ်ဂှ် မၞိဟ်ဂမၠိုၚ် တရာပ်ဖာပ်ဗ္စပိဏ္ဍပါတ် ကဵုခမဳဗြဴဂှ်တုဲမ္ဂး “ယွံနာဲဗြဴ မုဟိုတ် ခမဳဗြဴဂမၠိုၚ်လေဝ် ဟွံက္ညကၠုၚ်အိုတ်ရော?” ရဴဝွံ သၟာန်တုဲ ဟီုလဴဗ္စ ဟိုတ်ပရူပရာဝွံ ကုမၞိဟ်ဂမၠိုၚ်ရ။ မၞိဟ်ဂမၠိုၚ် “မုဟိုတ် ခမဳဗြဴဂှ် ဒှ်ညးသအေတ်သပါန် ပ္ဍဲဒကာရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် သအေတ်သပါန် ပ္ဍဲဒကာရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂှ် သအေတ်သပန် ပ္ဍဲဒကာရော? ယွံခမဳတအ် (ကမၠောန်ပွမၞးခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1043) “ယြဴခမဳဗြဴမွဲ ဒှ်ညးသအေတ်သပါန် ပ္ဍဲဂကူ ‘ဒကာ’ မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။