၄.၆.၂။ သိက္ခာပိုဒ်ဒုတိယ
1028) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာပြာသာဒ် မၞုံကဵုဓုပ်ပြကာ အပ္ဍဲဂြိုပ်မဟာဝိုန် ဇရေၚ်ဍုၚ်ဝေသာလဳဂှ် တဳလပိုဉ်ကပ္ပိကတ မဒှ်အ္စာဥပဇ္ၛာယ် တဳလပိုဉ်ဥပါလိဂှ် သ္ပဒတဴဒၟံၚ် ပ္ဍဲသုသာန်ရ။ ပ္ဍဲအဃောအခိၚ်ဂှ် ပၞောဝ်ခမဳဗြဴဆဗ္ဗဂ္ဂဳဂမၠိုၚ် ခမဳဗြဴမဒှ်ညးဇၞော်အိုတ်ဂှ် စုတိကလိလောန်စဴရ။ ခမဳဗြဴဆဗ္ဗဂ္ဂဳဂမၠိုၚ် ရၚ်တၠုၚ်ဂိုၚ်ကေတ် (ကလာပ်ရုပ်) ခမဳဗြဴဂှ်တုဲ စံၚ်ထောံပ္ဍဲဇရေၚ်ဘာ တဳလပိုဉ်ကပ္ပိတကတုဲ သ္ပတဴစတဳတုဲပ္ဍဲကြဴ အာတဴစေတဳဂှ်တုဲ လရိုအ်ယာံဒၟံၚ်အိုတ်ရ။ ပ္ဍဲအခိၚ်ဂှ် တဳလပိုဉ်ကပ္ပိတက ဗရုရမျာၚ်ဂှ် ပ္ဍဵုပ္ဍိုက်ရာန်သကိုတ်ဒှ်တုဲ ပလီုထောံစေတဳဂှ်တုဲ ပရးပဆာဲစွံလဝ်ရ။ ခမဳဗြဴဆဗ္ဗဂ္ဂဳဂမၠိုၚ် “ကပ္ပိတကဝွံ ပလီုပလာ်ထောံ စေတဳနာဲဗြဴပိုဲညးဂမၠိုၚ်ရ၊ ပ္ဍဲလၟုဟ်ဟေၚ် ပြိုက်ဂစိုတ်ထောံ ကပ္ပိတကဂှ်အိုတ်စိုအ်” ရဴဝွံ ချပ်ဂၞန်သဳကၠဳအိုတ်ရ၊ ခမဳဗြဴမွဲဇကုဂှ် ဂရၚ်ပတီလဴဗ္စ ဟိုတ်ပရူပရာဝွံ ကုတဳလပိုဉ်ဥပါလိရ၊ တဳလပိုဉ်ဥပါလိ ဂရၚ်ပတီလဴဗ္စ ဟိုတ်ပရူပရာဝွံ ကုတဳလပိုဉ်ကပ္ပိတကရ။ ပ္ဍဲအခိၚ်ဂှ် တဳလပိုဉ်ကပ္ပိတက တိတ်အာနူဘာဂှ်တုဲ သ္ဒးဗလေတ်ပဲါအောပ်ဗ္ဒဒၟံၚ်ရ။ ပ္ဍဲကြဴနူဂှ် ခမဳဗြဴဆဗ္ဗဂ္ဂဳဂမၠိုၚ် ပြာပ်အာဇရေၚ်ဘာ တဳလပိုဉ်ကပ္ပိတကအိုတ်တုဲ ကဵုဓလီုဍိုက်ကၠေံ ဘာတဳလပိုဉ်ကပ္ပိတက နကဵုတၟံကဠောံ တိကဠောံလေံဂမၠိုၚ်တုဲ “ကပ္ပိတက ချိုတ်ရ” ရဴဝွံ သမ္တီကေတ်တုဲ စ္ဍးအာအိုတ်ရ။ ပ္ဍဲကြဴနူဂှ် တဳလပိုဉ်ကပ္ပိတက ဗ္တံဂှ်လေဝ်ၜက်အာမ္ဂး ပ္ဍဲအခိၚ်နူဂှ် ဗိုက်ပဠေဝ်သ္ၚာတုဲ ဂိုၚ်ထ္ၜကေတ်ဗဗေၚ်သ္ၚာတုဲမ္ဂး လုပ်ဂ္ၚေၚ်ပိဏ္ဍပါတ် ဍုၚ်ဝေသာလဳရ။ ခမဳဗြဴဆဗ္ဗဂ္ဂဳဂမၠိုၚ် ညာတ်ဒးတဳလပိုဉ်ကပ္ပိတက ဂေတ်ဂ္ၚေၚ်ဒၟံၚ်ပိဏ္ဍပါတ်တုဲ “ကပ္ပိတက ဂျိုၚ်ဒၟံၚ်လမျီုဏီရ၊ မုရဴညးမွဲ ပလီုပလာ်ထောံ ကသပ်ဂၞန်ပိုဲညးဂမၠိုၚ်ရော?” ရဴဝွံ ဟီုသ္ဂးအိုတ်ရ။ ခမဳဗြဴဆဗ္ဗဂ္ဂဳဂမၠိုၚ် “တဳလပိုဉ်ထေရ်ဥပါလိ ပလီုပလာ်ထောံ ကသပ်ဂၞန်ပိုဲညးဂမၠိုၚ်အိုတ်ရဂး” ရဴဝွံ သ္ဂောံမိၚ်ကေတ်အိုတ်ရ။ ခမဳဗြဴဂမၠိုၚ်ဂှ် “ဥပါလိ ညးဇာတ်ယုတ်သဝ် ဗိုက်လတက်ယာတ်သၟာဆတ္တာဂမၠိုၚ် မဖျောန်ဍာ်လွံက်တုဲ မ္ဒးသအးဇ္ၚးကဵုကၠိုက်လ္ၚေၚ်ဝွံ မုဟိုတ် ပလီုပလာ်ထောံ ကသပ်ဂၞန်ပိုဲညးဂမၠိုၚ်အိုတ်ရော?” ရဴဝွံ တ္ၜေဟ်လက်အိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဆဗ္ဗဂ္ဂဳဂမၠိုၚ် တ္ၜေဟ်လက် တဳလပိုဉ်ဥပါလိအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဆဗ္ဗဂ္ဂဳဂမၠိုၚ် တ္ၜေဟ်လက် ဥပါလိအိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဆဗ္ဗဂ္ဂဳဂမၠိုၚ် တ္ၜေဟ်လက် ဥပါလိအိုတ်ရော? ယွံခမဳတအ် (ကမၠောန်ပွခမဳဗြဴဆဗ္ဗဂ္ဂဳဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတညိ။
1029) “ယြဴခမဳဗြဴမွဲ တ္ၜေဟ်လက်လေဝ် တ္ၜေဟ်လက် ခမဳတြုံမ္ဂး၊ လဗပ်ပကီုလေဝ်လဗပ်ပကီုမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
