၄.၆.၁၀.၁။ ပွံက်သိက္ခာပိုဒ်ဒသမ

1064) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ သၟဝ်ကၞာၚ်ဂါပ်ဒဳၜါ မ္ဂးဂှ် ဌာန်မဒှ်သၟဝ်ပံၚ်ကဠုတ် လတူဗၞဳအဝဏ်တၚ်က္ၜံၚ်ၜါရောၚ်။ ကတဵုဒှ် မ္ဂးဂှ် သရမကတဵုဒှ် ပ္ဍဲဌာန်ဂှ်ရောၚ်။ ခ္ဍတ်ဗြိုအ်မာ မ္ဂးဂှ် ယဲဂုဟ်ကဠောံကဠေန်မမိက်ကဵုမွဲမွဲရောၚ်။ သရသရေန် မ္ဂးဂှ် သရသရေန်မမိက်ကဵုမွဲမွဲရောၚ်။ ဟွံဂရၚ်ပတီလဴဗ္စတုဲ မ္ဂးဂှ် ဟွံသၟာန်တုဲ။ သၚ် မ္ဂးဂှ် သ္ဂးတဴဘိက္ခုနဳသၚ်ရ။ ဂိုဏ် မ္ဂးဂှ် သ္ဂးတဴ ခမဳဗြဴဂမၠိုၚ်မဂၠိုၚ် (ၜါဇကုပိဇကု) ရ။ တြုံ မ္ဂးဂှ် တြုံလကိုဟ်ဟွံသေၚ် တြုံပြိုတ်ဟွံသေၚ် တြုံတိရစ္ဆာန်ဟွံသေၚ် တြုံမၞိဟ် မတီကၠိုဟ်ခၠၚ် မသၟဟ်စောံ တၞဟ်နပွမပလီုပလာ်ဟေၚ်ရောၚ်။ မွဲဟာန် မ္ဂးဂှ် မွဲဂကောံဓဝ်။ ညးမွဲကေုာံညးမွဲ မ္ဂးဂှ် တြုံကီု ခမဳဗြဴကီုဒှ်ရ။

1065) “ဩဝ်ကရေက်ညိ” ရဴဝွံ ဖအောဝ်စကာမ္ဂး၊ ဒးအာပတ်ဒုက္ကဋ်ရ။ ကရေက်တုဲမ္ဂး၊ ဒးအာပတ်ပဲါစိုတ်ရ။ “ဩဝ်ၜံက်ညိ” ရဴဝွံ ဖအောဝ်စကာမ္ဂး၊ ဒးအာပတ်ဒုက္ကဋ်ရ။ ၜံက်တုဲမ္ဂး၊ ဒးအာပတ်ပဲါစိုတ်ရ။ “ဩဝ်ကြာတ်ဍာ်လွံက်ညိ” ရဴဝွံ ဖအောဝ်စကာမ္ဂး၊ ဒးအာပတ်ဒုက္ကဋ်ရ။ ကြာတ်ဍာ်လွံက်တုဲမ္ဂး၊ ဒးအာပတ်ပဲါစိုတ်ရ။ “ဩဝ်လံက်ဂဥုဲညိ” ရဴဝွံ ဖအောဝ်စကာမ္ဂး၊ ဒးအာပတ်ဒုက္ကဋ်ရ။ လံက်ဂဥုဲတုဲမ္ဂး၊ ဒးအာပတ်ပဲါစိုတ်ရ။ “ဩဝ်ဂွဳဒက်ညိ” ရဴဝွံ ဖအောဝ်စကာမ္ဂး၊ ဒးအာပတ်ဒုက္ကဋ်ရ။ ဂွဳဒက်တုဲမ္ဂး၊ ဒးအာပတ်ပဲါစိုတ်ရ။ “ဩဝ်သှ်ပၠိုဟ်ညိ” ရဴဝွံ ဖအောဝ်စကာမ္ဂး၊ ဒးအာပတ်ဒုက္ကဋ်ရ။ သှ်ပၠိုဟ်တုဲမ္ဂး၊ ဒးအာပတ်ပဲါစိုတ်ရ။

1066) ဂရၚ်ပတီလဴဗ္စတုဲ ကရေက်လေဝ်ကဵုကရေက်မ္ဂး၊ ၜံက်လေဝ်ကဵုၜံက်မ္ဂး၊ ဍာ်လွံက်လေဝ် ကဵုကြာတ်ကြဴမ္ဂး၊ ဂဥုဲလေဝ် ကဵုလံက်လေတ်မ္ဂး၊ ဂွဳဒက်လေဝ်ကဵုဂွဳဒက်မ္ဂး၊ သှ်ပၠိုဟ်လေဝ် သှ်ပၠိုဟ်မ္ဂး၊ သကအ်ပွံၚ်စဳကၠးဆိုက်ဗ္ဒက်မမိက်ကဵုမွဲမွဲလေဝ် နွံမ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ဒသမတုဲရ။ အာရာမဝဂ်ဆဋ္ဌတုဲရ။