၄.၆.၁၀။ ပွံက်သိက္ခာပိုဒ်ဒသမ

1062) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴမွဲဇကု မွဲဟာန်ကေုာံတြုံ ညးမွဲကေုာံညးမွဲ သကဵုကရေက်ကၠေံ ခ္ဍတ်ဗြိုအ် မကတဵုဒှ်သၟဝ်ကၞာၚ်ဂါပ်ဒဳၜါရ။ ပ္ဍဲအခိၚ်ဂှ် တြုံဂှ် သ္ပလွဳပရာ တၞဟ်နပလီုပလာ် ခမဳဗြဴဂှ်ရ၊ ခမဳဗြဴဂှ် သ္ပတဴဗရုရမျာၚ်မပၠန်ဂတးဂှ်ရ ခမဳဗြဴဂမၠိုၚ် ဂြိပ်ကၠုၚ်အိုတ်တုဲမ္ဂး “ယွံနာဲဗြဴ တၠအဲ မုဟိုတ် သ္ပတဴ ဗရုရမျာၚ်မပၠန်ဂတးရော?” ရဴဝွံ သၟာန်ခမဳဗြဴဂှ်အိုတ်ရ။ ပ္ဍဲအခိၚ်ဂှ် ခမဳဗြဴဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴသအာၚ်ဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် မွဲဟာန်ကေုာံတြုံ ညးမွဲကေုာံညးမွဲ သကဵုကရေက်ကၠေံ ခ္ဍတ်ဗြိုအ် မကတဵုဒှ်ပ္ဍဲသၟဝ်ကၞာၚ်ဂါပ်ဒဳၜါရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် မွဲဟာန်ကေုာံတြုံ ညးမွဲကေုာံညးမွဲ သကဵုကရေက်ကၠေံ ခ္ဍတ်ဗြိုအ် မကတဵုဒှ်ပ္ဍဲသၟဝ်ကၞာၚ်ဂါပ်ဒဳၜါရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂှ် မွဲဟာန်ကေုာံတြုံ ညးမွဲကေုာံညးမွဲ သကဵုကရေက်ကၠေံ ခ္ဍတ်ဗြိုအ် မကတဵုဒှ်ပ္ဍဲသၟဝ်ကၞာၚ်ဂါပ်ဒဳၜါရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1063) “ယြဴခမဳဗြဴမွဲ ခ္ဍတ်, ဗြိုအ်, မာကီု သရသရေန်ကီု မကတဵုဒှ်ပ္ဍဲသၟတ်ကၞာၚ်ဂါပ်ဒဳၜါဂှ် ဟွံဂရၚ်ပတီလဴဗ္စ သၚ်ကီု ဂိုဏ်ကီုတုဲ မွဲဟာန်ကေုာံတြုံ ညးမွဲကေုာံညးမွဲ ကရေက်လေဝ်ကဵုကရေက်မ္ဂး၊ ၜံက်လေဝ်ကဵုၜံက်မ္ဂး၊ ဍာ်လွံက်လေဝ် ကဵုကြာတ်ကြဴမ္ဂး၊ ဂဥုဲလေဝ် ကဵုလံက်လေတ်မ္ဂး၊ ဂွဳဒက်လေဝ်ကဵုဂွဳဒက်မ္ဂး၊ သှ်ပၠိုဟ်လေဝ် သှ်ပၠိုဟ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။