၄.၆.၁.၁။ ပွံက်သိက္ခာပိုဒ်ပဌမ
1025) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ တီရ မ္ဂးဂှ် အလဵုဇကုလေဝ် တီရ၊ ညးသအာၚ်ဂမၠိုၚ်လေဝ် ဟီုလဴကုခမဳဗြဴဂှ်အိုတ်ရ၊ ခမဳဂှ်လေဝ် ဟီုလဴရ။ အာရှာမ်မၞုံကဵုခမဳ မ္ဂးဂှ် ယြဴပ္ဍဲဌာန်မွဲ ခမဳဂမၠိုၚ် ပ္ဍဲသၟဝ်တမ်ဆုလေဝ် ပဒတဴအိုတ်ရ၊ (ဌာန်ဂှ်ရောၚ်)။ ဟွံဂရၚ်ပတီလဴဗ္စ လုပ်ကၠုၚ်အပ္ဍဲအာရှာမ် မ္ဂးဂှ် ဟွံဂရၚ်ပတီလဴဗ္စ ခမဳကဵုဒှ် သာမဏဳကဵုဒှ် ပၟၚ်အာရှာမ်ကဵုဒှ်တုဲ ကုခမဳဗြဴမကဵုကလိလောန်အာ အစဵုအဗိုၚ် ဘာမၞုံကဵုအစဵုအဗိုၚ်ဒပ်ဂှ် ဒးအာပတ်ပဲါစိုတ်ရ။ ကုခမဳဗြဴမကဵုတၞီလုပ်အာ ဥပစာဘာဟွံမွဲကဵုအစဵုအဗိုၚ်ဒပ်ဂှ် ဒးအာပတ်ပဲါစိုတ်ရ။
1026) ပ္ဍဲအပ္ဍဲအာရှာမ်မၞုံကဵုခမဳ မၞုံကဵုစၟတ်သမ္တီ အပ္ဍဲအာရှာမ်မၞုံကဵုခမဳဒှ်တုဲ သီုဟွံဂရၚ်ပတီလဴဗ္စ ခမဳမၞုံတဴပြာကဋ် လုပ်ကၠုၚ်အပ္ဍဲအာရှာမ်မ္ဂး၊ ဒးအာပတ်ပဲါစိုတ်ရ။ ပ္ဍဲအပ္ဍဲအာရှာမ်မၞုံကဵုခမဳ မၞုံကဵုသၠေဟ်ပၟာဒှ်တုဲ သီုဟွံဂရၚ်ပတီလဴဗ္စ ခမဳမၞုံတဴပြာကဋ် လုပ်ကၠုၚ် အပ္ဍဲအာရှာမ်မ္ဂး၊ ဒးအာပတ်ဒုက္ကဋ်ရ။ ပ္ဍဲအပ္ဍဲအာရှာမ်မၞုံကဵုခမဳ မၞုံကဵုစၟတ်သမ္တီ အပ္ဍဲအာရှာမ်ဟွံမွဲကဵုခမဳဒှ်တုဲ သီုဟွံဂရၚ်ပတီလဴဗ္စ ခမဳမၞုံတဴပြာကဋ် လုပ်ကၠုၚ်အပ္ဍဲအာရှာံမ္ဂး၊ ဟွံဒးအာပတ်ရ။ ပ္ဍဲအပ္ဍဲအာရှာမ်မဟွံမွဲကဵုခမဳ မၞုံကဵုစၟတ်သမ္တီ အပ္ဍဲအာရှာမ်မၞုံကဵုခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲအပ္ဍဲအာရှာမ်မဟွံမွဲကဵုခမဳ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအပ္ဍဲအာရှာမ်မဟွံမွဲကဵုခမဳ မၞုံကဵုစၟတ်သမ္တီ အပ္ဍဲအာရှာမ်ဟွံမွဲကဵုခမဳမ္ဂး၊ ဟွံဒးအာပတ်ရ။
1027) ဂရၚ်ပတီလဴဗ္စ ခမဳမၞုံတဴပြာကဋ် လုပ်အာမ္ဂး၊ ဟိုတ်နူခမဳဟွံမွဲပြာကဋ်တုဲ သီုဟွံဂရၚ်ပတီ လုပ်အာမ္ဂး၊ သ္ၚေဝ်ရံၚ်ဗက် က္ဍိုပ်သကိုပ်ခမဳဗြဴဂမၠိုၚ် လုပ်အာဗွဲကိုပ်ကၠာတုဲ လုပ်အာမ္ဂး၊ အာတဴ ဌာန်ကောံဓရီုခမဳဗြဴဂမၠိုၚ်မ္ဂး၊ ဒှ်ဂၠံၚ်တရဴ (မဒးတတ်အာ) နူအာရှာမ်မ္ဂး၊ ဟွံဒးအာပတ်ရ၊ ကုခမဳဗြဴမဂိယဲလေဝ် ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ်လေဝ် ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ပဌမတုဲရ။
