၄.၆.၁။ သိက္ခာပိုဒ်ပဌမ
1021) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဂမၠိုၚ်ဗွဲမဂၠိုၚ် သီုမဗိုက်လဝ်သ္ၚာမွဲဂတှေ်ဓဝ်ဟေၚ် ဇိၚ်ဒၟံၚ်သ္ၚာ ပ္ဍဲဘာကွာန်အိုတ်ရ။ ခမဳဗြဴဂမၠိုၚ် သီုဟွံဂရၚ်ပတီလဴဗ္စ လုပ်ကၠုၚ်အာပ္ဍဲအာရှာမ်တုဲ ပြာပ်အာဇရေၚ် ခမဳဂမၠိုၚ် မဇိၚ်ဒၟံၚ်သ္ၚာဂှ်အိုတ်ရ။ ခမဳဂမၠိုၚ် “မုဟိုတ် ခမဳဗြဴဂမၠိုၚ် သီုဟွံဂရၚ်ပတီလဴဗ္စ လုပ်ကၠုၚ်အပ္ဍဲအာရှာမ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် သီုဟွံဂရၚ်ပတီလဴဗ္စ လုပ်ကၠုၚ်အပ္ဍဲအာရှာမ်အိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် သီုဟွံဂရၚ်ပတီလဴဗ္စ လုပ်ကၠုၚ်အပ္ဍဲအာရှာမ်အိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။ “ယြဴခမဳဗြဴမွဲ သီုဟွံဂရၚ်ပတီလဴဗ္စ လုပ်ကၠုၚ်အပ္ဍဲအာရှာမ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဗြဴဂမၠိုၚ်ရ။
1022) ပ္ဍဲအဃောအခိၚ်ဂှ် ခမဳဂမၠိုၚ် စ္ဍးအာနူဘာဂှ်အိုတ်ရ။ ခမဳဗြဴဂမၠိုၚ် “တဳလပိုဉ်မဆာဲဂမၠိုၚ် စ္ဍးအာအိုတ်တုဲရ” ရဴဝွံ ဟွံအာအပ္ဍဲအာရှာမ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ် ကလေၚ်ကၠုၚ်ဘာဂှ်မွဲလှေ်ပၠန်အိုတ်ရ။ ခမဳဗြဴဂမၠိုၚ် “တဳလပိုဉ်မဆာဲဂမၠိုၚ် ကလေၚ်စဴကၠုၚ်အိုတ်ရ” ရဴဝွံ ဂရၚ်ပတီလဴဗ္စတုဲ လုပ်ကၠုၚ်အပ္ဍဲအာရှာမ်တုဲမ္ဂး ပြာပ်အာဇရေၚ်ခမဳဂမၠိုၚ်ဂှ်တုဲ လ္ၚောဝ်သ္ပဝတ်တုဲပ္ဍဲကြဴ ဂဇအ်ဒၟံၚ်ပ္ဍဲဒၞဲါမွဲအိုတ်ရ။ ခမဳဗြဴဂမၠိုၚ်မဂဇအ်ဒၟံၚ် ပ္ဍဲဒၞဲါမွဲတုဲဂှ် “ယွံဒေံဗြဴ မၞးတအ်ညးဂမၠိုၚ် မုဟိုတ် ဟွံကွဟ်ကၟဟ်အာရှာမ်အိုတ်ရော? ဟွံစွံပတန်ဍာ်သုၚ် ဍာ်ရပ်စပ်အိုတ်ရော?” ရဴဝွံ ခမဳဂမၠိုၚ် သ္ဂးအိုတ်ရ။ “ယွံတဳလပိုဉ်တအ် သီုဟွံဂရၚ်ပတီလဴဗ္စ လုပ်အာရှာမ်ဟွံဂွံ” ရဴဝွံ တဳလမၞုံပုဉ်ကျာ်တြဲ ပညပ်လဝ်သိက္ခာပိုဒ်ရ။ ဟိုတ်ဂှ်ရ ပိုဲဍိက်တအ်ညးဂမၠိုၚ် ဟွံကၠုၚ်အာရှာမ်အိုတ်ရ ရဴဝွံ ဂရၚ်ပတီလဴစ ခမဳမၞုံတဴပြာကဋ်တုဲ တၞဟ်နပွမလုပ်အာရှာမ် ကဵုအခေါၚ်ရ ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။ “ယြဴခမဳဗြဴမွဲ သီုဟွံဂရၚ်ပတီလဴဗ္စ ခမဳမၞုံတဴပြာကဋ် လုပ်ကၠုၚ်အပ္ဍဲအာရှာမ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဗြဴဂမၠိုၚ်ရ။
1023) ပ္ဍဲအဃောအခိၚ်ဂှ် ခမဳဂမၠိုၚ် စ္ဍးအာနူဘာဂှ်အိုတ်တုဲ ပ္ဍဲကြဴ မွဲလှေ်ပၠန် ကလေၚ်စဴကၠုၚ် ဘာဂှ်အိုတ်ပၠန်ရ။ ခမဳဗြဴဂမၠိုၚ် “တဳလပိုဉ်မဆာဲဂမၠိုၚ် စ္ဍးအာအိုတ်တုဲရ” ရဴဝွံ သီုဟွံဂရၚ်ပတီလဴဗ္စ လုပ်ကၠုၚ်အပ္ဍဲအာရှာမ်အိုတ်ရ။ “သီုဟွံဂရၚ်ပတီလဴဗ္စ ခမဳမၞုံတဴပြာကဋ် လုပ်အာရှာမ်ဟွံဂွံ” ရဴဝွံ တဳလမၞုံပိုဉ်ကျာ်တြဲ ပညပ်လဝ်သိက္ခာပိုဒ်ရ။ ၜိုန်ဂှ်လေဝ် ပိုဲညးဂမၠိုၚ် သီုဟွံဂရၚ်ပတီလဴဗ္စ ခမဳမၞုံတဴပြာကဋ် လုပ်ဒးအာရှာမ်အိုတ်ရ၊ ပသာ်ရော? ကုပိုဲညးဂမၠိုၚ် ဒးအာပတ်ပဲါစိုတ်ဟာ” ရဴဝွံ ခမဳဗြဴဂမၠိုၚ် ဒှ် ‘သံသယကုက္ကုစ္စ’ ပွမချပ်သၠေဟ်ပၟာအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ဟီုတွံကဵုဂလာန်ဓရ်တုဲ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
1024) “ယြဴခမဳဗြဴမွဲ သီုကဵုမတီတဴ ဟွံဂရၚ်ပတီလဴဗ္စတုဲ လုပ်ကၠုၚ်အပ္ဍဲအာရှာမ် မၞုံကဵုခမဳမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
