၄.၅.၈။ သိက္ခာပိုဒ်အဋ္ဌမ

1008) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ သီုဟွံသၠးကၠေံဘာဂှ် စ္ဍးအာဒေသစာရိတ်ရ။ ပ္ဍဲအခိၚ်ဂှ် ဘာခမဳဗြဴထုလ္လနန္ဒာ တူအာပၟတ်တုဲ ခမဳဗြဴဂမၠိုၚ် “ယွံနာဲဗြဴတအ် ရၚ်တၠုၚ်ယိုက်ပတိတ် ကပေါတ်အိုတ်စိုအ်” ရဴဝွံ သီုသ္ဂးအိုတ်ရ။ ခမဳဗြဴဂမၠိုၚ်ဂှ် “ယွံနာဲဗြဴတအ် ပိုဲညးဂမၠိုၚ် ဟွံမိက်ရၚ်တၠုၚ်ယိုက်ပတိတ်အိုတ်ရ၊ ကပေါတ် ကညတ်မမိက်ကဵုမွဲမွဲ ကၠေံနှၚ်အာမ္ဂး သွက်ကပေါတ်ကညတ်အိုတ်သီုဂှ် ကြက်စၟဳစၟတ် ပိုဲညးဂမၠိုၚ် ရ” ရဴဝွံ ဟီုသ္ဂးအိုတ်ရ။ ခမဳဗြဴထုလ္လနန္ဒာ ကလေၚ်စဴကၠုၚ်ဘာ မွဲလှေ်ပၠန်တုဲ “ယွံနာဲဗြဴတအ် ရၚ်တၠုၚ်ယိုက်ပတိတ်လဝ် ကပေါတ်ကညတ်အိုတ်ကီုဟာ” ရဴဝွံ သၟာန်ခမဳဗြဴဂမၠိုၚ်ဂှ်ရ ယွံနာဲဗြဴတအ် ပိုဲဍိက်တအ် ညးဂမၠိုၚ် ဟဂွံရၚ်တၠုၚ်ယိုက်ပတိတ်အိုတ်ရ ရဴဝွံ ဟီုသ္ဂးအိုတ်ရ။ ခမဳဗြဴထုလ္လနန္ဒာဂှ် “မုဟိုတ် ခမဳဗြဴဂမၠိုၚ် သီုကဵုပၟတ်တူဒၟံၚ်ဘာဂှ် ဟွံရၚ်တၠုၚ်ယိုက်ပတိတ် ကပေါတ်ကညတ်အိုတ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ သီုဟွံသၠးကၠေံဘာဂှ် စ္ဍးအာဒေသစာရိတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ သီုဟွံသၠးကၠေံဘာဂှ် စ္ဍးအာဒေသစာရိတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ သီုဟွံသၠးကၠေံဘာဂှ် စ္ဍးအာဒေသစာရိတ်ရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

1009) “ယြဴခမဳဗြဴမွဲ ဟွံသၠးကၠေံဘာတုဲ စ္ဍးအာဒေသစာရိတ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။