၄.၅.၇.၁။ ပွံက်သိက္ခာပိုဒ်သတ္တမ
1005) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ သ္ၚာဒုၚ်ဆီဥတု မ္ဂးဂှ် ခမဳဗြဴဥတုကၠုၚ်ဂမၠိုၚ် ဩဝ်ရပ်စပ်ပြဘိုဂ်အိုတ်ညိ ရဴဝွံ (ရန်တၟံတုဲ) သ္ၚာမကဵုလဝ်ဒါန်ရောၚ်။ ဟွံသၠးကၠေံတုဲ ရပ်စပ်ပြဘိုဂ် မ္ဂးဂှ် ရပ်စပ်ပြဘိုဂ် ၜါဗ္တံပိဗ္တံတုဲ ပ္ဍဲကြဴ ပ္ဍဲတ္ၚဲမရနုက်ကဵုပန်ဂှ် လပိုက်ကြာတ်ကြဴတုဲမ္ဂး၊ သီုဟွံသၠးကဵု ကုခမဳဗြဴ သိက္ခမာန် သာမဏဳဗြဴဂမၠိုၚ် ရပ်စပ်ပြဘိုဂ်မ္ဂး၊ ဒးအာပတ်ပဲါစိုတ်ရ။
1006) ပ္ဍဲမဟဂွံသၠးကၠေံဏီ မၞုံကဵုစၟတ်သမ္တီ မဟဂွံသၠးကၠေံဏီဒှ်တုဲ ရပ်စပ်ပြဘိုဂ်မ္ဂး၊ ဒးအာပတ်ပဲါစိုတ်ရ။ ပ္ဍဲမဟဂွံသၠးကၠေံဏီ မၞုံကဵုသၠေဟ်ပၟာဒှ်တုဲ ရပ်စပ်ပြဘိုဂ်မ္ဂး၊ ဒးအာပတ်ပဲါစိုတ်ရ။ ပ္ဍဲမဟဂွံသၠးကၠေံဏီ မၞုံကဵုစၟတ်သမ္တီ သၠးကၠေံတုဲဒှ်တုဲ ရပ်စပ်ပြဘိုဂ်မ္ဂး၊ ဒးအာပတ်ပဲါစိုတ်ရ။ ပ္ဍဲမသၠးကၠေံတုဲ မၞုံကဵုစၟတ်သမ္တီ မဟဂွံသၠးကၠေံဏီမ္ဂး၊ ဒးအာပတ်ဒုက္ကဋ်ရ။ ပ္ဍဲမသၠးကၠေံတုဲ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲမသၠးကၠေံတုဲ မၞုံကဵုစၟတ်သမ္တီ သၠးကၠေံတုဲမ္ဂး၊ ဟွံဒးအာပတ်ရ။
1007) သၠးကၠေံတုဲမှ ရပ်စပ်ပြဘိုဂ်မ္ဂး၊ နမစိုပ်အလန်ဇကုမွဲလှေ်ပၠန် ရပ်စပ်ပြဘိုဂ်မ္ဂး၊ ခမဳဗြဴ ဥတုကၠုၚ်သအာၚ်ဂမၠိုၚ် ဟွံမွဲအိုတ်မ္ဂး၊ ဟွံဒးအာပတ်ရ၊ ကုခမဳဗြဴမၞုံကဵုသ္ၚာဒးဒုၚ်ပၠံၚ်ၜးဏာ ခမဳဗြဴမၞုံကဵုသ္ၚာကၠေံလေၚ်အာ၊ ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ်လေဝ်၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်သတ္တမတုဲရ။
