၄.၅.၅။ သိက္ခာပိုဒ်ပဉ္စမ

994) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴမွဲဇကု ပြာပ်အာဇရေၚ် ခမဳဗြဴထုလ္လနန္ဒာတုဲ “ယွံနာဲဗြဴ ဩဝ်ကၠုၚ်ညိ၊ ဩဝ်ကဵုလလမ်ကၠေံ အဓိကိုရ်ဝွံညိ” ရဴဝွံ သ္ဂးရ။ ခမဳဗြဴထုလ္လနန္ဒာဂှ် ခိုဟ်သန်ရ ရဴဝွံ ဒုၚ်ဝန်တုဲ လလမ်လေဝ် ဟွံကဵုလလမ်ရ၊ တၞဟ်နပွမကဵုလလမ်လေဝ် ဟွံလွဳပရာရ၊ ပ္ဍဲအခိၚ်ဂှ် ခမဳဗြဴဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာဂှ် ‘ယွံနာဲဗြဴ ဩဝ်ကၠုၚ်ညိ၊ ဩဝ်ကဵုလလမ်ကၠေံ အဓိကိုရ်ဝွံညိ’ ရဴဝွံ ခမဳဗြဴ ဟီုသ္ဂးကၠုၚ်ဂှ် ခိုဟ်သန်ရ ရဴဝွံ သီုမဒုၚ်ဝန်လလမ်လေဝ် ဟွံကဵုလလမ်ရော? တၞဟ်နပွမကဵုလလမ်လေဝ် ဟွံလွဳပရာရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ ယွံခမဳတအ် ခမဳဗြဴထုလ္လနန္ဒာဂှ် “ယွံနာဲဗြဴ ဩဝ်ကၠုၚ်ညိ၊ ဩဝ်ကဵုလလမ်ကၠေံ အဓိကိုရ်ဝွံညိ” ရဴဝွံ ခမဳဗြဴ ဟီုသ္ဂးကၠုၚ်ဂှ် ခိုဟ်သန်ရ ရဴဝွံ သီုမဒုၚ်ဝန် လလမ်လေဝ် ဟွံကဵုလလမ်ရ၊ တၞဟ်နပွမကဵုလလမ်လေဝ် ဟွံလွဳပရာရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာဂှ် “ယွံနာဲဗြဴ ဩဝ်ကၠုၚ်ညိ၊ ဩဝ်ကဵုလလမ်ကၠေံ အဓိကိုရ်ဝွံညိ” ရဴဝွံ ခမဳဗြဴ ဟီုသ္ဂးကၠုၚ်ဂှ် ခိုဟ်သန်ရ ရဴဝွံ သီုမဒုၚ်ဝန် လလမ်လေဝ် ဟွံကဵုလလမ်ရော? တၞဟ်နပွမကဵုလလမ်လေဝ် ဟွံလွဳပရာရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

995) “ယြဴခမဳဗြဴမွဲ ခမဳဗြဴဂှ် ‘ယွံနာဲဗြဴ ဩဝ်ကၠုၚ်ညိ၊ ဩဝ်ကဵုလလမ်ကၠေံ အဓိကိုရ်ဝွံညိ’ ရဴဝွံ ဟီုသ္ဂးကၠုၚ်မ္ဂး ‘ခိုဟ်သန်ရ’ ရဴဝွံ ဒုၚ်ဝန်တုဲ ခမဳဗြဴဂှ် ပ္ဍဲကာလကြဴ သီုဟွံမွဲကဵုအန္တရာယ် လလမ်လေဝ် ဟွံကဵုလလမ်မ္ဂး၊ တၞဟ်နပွမကဵုလလမ်လေဝ် ဟွံလွဳပရာမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။