၄.၅.၁။ သိက္ခာပိုဒ်ပဌမ

977) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ပ္ဍဲတိုက်ပျးထ္ၜး မၞုံအပ္ဍဲဥဒျာန် သၟိၚ်ဇၞော်ပသေနဒဳကောသလဂှ် ကၠောန်ခၞံလဝ် တၞးကသဴထ္ၜးအစောံဉာဏ်တုဲ မၞိဟ်ဂမၠိုၚ်ဗွဲမဂၠိုၚ် အာတဴ သွက်ဂွံဗဵုသ္ၚေဝ်တိုက်ပျးထ္ၜးအိုတ်ရ။

ခမဳဗြဴဆဗ္ဗဂ္ဂဳဂမၠိုၚ်လေဝ် အာတဴ သွက်ဂွံဗဵုသ္ၚေဝ်တိုက်ပျးထ္ၜးအိုတ်ရ။ မၞိဟ်ဂမၠိုၚ် “မုဟိုတ် ခမဳဗြဴဂမၠိုၚ် ညံၚ်ရဴမၞိဟ်ဗြဴမဒုၚ်စသိုၚ်ကာမဂုဏ်ဂမၠိုၚ်ကီု အာတဴ သွက်ဂွံဗဵုသ္ၚေဝ် တိုက်ပျးထ္ၜးအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဗြဴဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။

ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဆဗ္ဗဂ္ဂဳဂမၠိုၚ် အာတဴ သွက်ဂွံဗဵုသ္ၚေဝ်တိုက်ပျးထ္ၜးအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဆဗ္ဗဂ္ဂဳဂမၠိုၚ် အာတဴ သွက်ဂွံဗဵုသ္ၚေဝ်တိုက်ပျးထ္ၜးအိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟနာ်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဆဗ္ဗဂ္ဂဳဂမၠိုၚ် အာတဴ သွက်ဂွံဗဵုသ္ၚေဝ်တိုက်ပျးထ္ၜးအိုတ်ရော? ယွံခမဳတအ် (ကမၠောန်ပွခမဳဗြဴဆဗ္ဗဂ္ဂဳဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျၚ်ဇြုၚ်သ္ဍိုက်ကီု ။ ပ ။

ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

978) “ယြဴခမဳဗြဴမွဲ အာတဴ တၞဟ်နပွမဗဵုဝေၚ် သ္ၚိပွေၚ်သၟိၚ်ကီု တိုက်ပျးထ္ၜးကီု အာရှာမ်ကီု ဥဒျာန်ကီု ကၟာလ္စကီုမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွဴ သ္ဂးရ)။