၄.၄.၅။ သိက္ခာပိုဒ်ပဉ္စမ
950) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ဘဒ္ဒါကာပိလာနဳ ပြာပ်လုပ်ဒဂိုန် ပ္ဍဲဍုၚ်သာကေတရ။ ဘဒ္ဒါကာပိလာနဳဂှ် ကမၠောန်ကေၚ်ကာထေက်ကဵုသ္ပမမိက်ကဵုမွဲမွဲ ဂပ်ဝ်ကဵုခ္ဍဟ်ကတဵုဗွဲမဃရက်ဂဗက်ဒှ်တုဲ “နာဲဗြဴထုလ္လနန္ဒာ ယဝ်ကဵုဘာ ကုအဲမ္ဂး၊ အဲ မိက်ကလေၚ်စဴကၠုၚ် ဍုၚ်သာရဝှ်ရ” ရဴဝွံ ဗလးဏာကလုတ် ဇရေၚ်ခမဳဗြဴထုလ္လနန္ဒာရ။ ခမဳဗြဴထုလ္လနန္ဒာဂှ် “ကၠုၚ်ဟေၚ်ဩဝ်ကၠုၚ်ညိ ကြက်ကဵုရ” ရဴဝွံ သ္ဂးရ။ ပ္ဍဲအခိၚ်ဂှ် ဘဒ္ဒါကာပိလာနဳ နူဍုၚ်သာကေတ ကၠုၚ်ဍုၚ်သာရဝှ်ရ။ ခမဳဗြဴထုလ္လနန္ဒာ ကဵုထောံဘာကုဘဒ္ဒါကာပိလာနဳရ။ ပ္ဍဲအခိၚ်ဂှ် ခမဳဗြဴထုလ္လနန္ဒာ လမိၚ်လညာတ်ဂၠိုၚ်တုဲ ဟီုတွံခိုဟ်ရ၊ တၞဟ်နတွံဓရ် ဂံၚ်သကာတုဲ မၞုံကဵုအစောံသတ္တိရ၊ ဘဒ္ဒါကာပိလာနဳလေဝ် လမိၚ်လညာတ်ဂၠိုၚ်တုဲ ဟီုတွံခိုဟ်ရ၊ တၞဟ်နတွံဓရ် ဂံၚ်သကာတုဲ မၞုံကဵုအစောံသတ္တိရ၊ ညးမပြဲရဴဝွံလေဝ် ဂပ်ဝ်ထိုၚ်သးရ။ မၞိဟ်ဂမၠိုၚ် “နာဲဗြဴဘဒ္ဒါကာပိလာနဳဂှ် လမိၚ်လညာတ်ဂၠိုၚ်တုဲ ဟီုတွံခိုဟ်ရ၊ တၞဟ်နတွံဓရ်လေဝ် ဂံၚ်သကာတုဲ မၞုံကဵုအစောံသတ္တိရ၊ ညးမပြဲရဴဝွံလေဝ် ဂပ်ဝ်ထိုၚ်သးရ” ရဴဝွံ ပြာပ်ခသဳကၠဳ ဘဒ္ဒါကာပိလာနဳ ဗွဲကိုပ်ကၠာတုဲ ပ္ဍဲလက်ကရဴမှ ပြာပ်ခသဳကၠဳ ခမဳဗြဴထုလ္လနန္ဒာအိုတ်ရ။ ခမဳဗြဴထုလ္လနန္ဒာ စောန်စိုတ်ဇၞော်တုဲ “ခမဳဗြဴဂမၠိုၚ် မၞုံကဵုပွကဵုတီဂၠိုၚ် (လလောၚ်တြး) ပွမထၟံက်ထ္ၜးဂုဏ်ဂၠိုၚ်ဝွံဟေၚ် ပၟိက်အောန်အိုတ်ရဂး တရိုပ်စိုတ်အိုတ်ရဂး လ္ၚုသုန်အိုတ်ရဂး ဟွံမွဲကဵုပွမနှဴရဴအိုတ်ရဂး” ရဴဝွံ (ဟီုသ္ဂးတုဲ) ထေဲပၞတ်သတိုတ် ဟွံမိပ်စိုတ်တုဲ တံၚ်ဓဇက်ပတိတ် ဘဒ္ဒါကာပိလာနဳ နူဘာရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ ကဵုဘာ ကုနာဲဗြဴဘဒ္ဒါကာပိလာနဳတုဲမှ ထေဲပၞတ်သကိုတ် ဟွံမိပ်စိုတ်တုဲ တံၚ်ဓဇက်ပတိတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ။ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ ကဵုဘာ ကုခမဳဗြဴဘဒ္ဒါကာပိလာနဳတုဲမှ ထေဲပၞတ်သတိုတ် ဟွံမိပ်စိုတ်တုဲ တံၚ်ဓဇက်ပတိတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ ကဵုဘာ ကုခမဳဗြဴဘဒ္ဒါကာပိလာနဳတုဲမှ ထေဲပၞတ်သကိုတ် ဟွံမိပ်စိုတ်တုဲ တံၚ်ဓဇက်ပတိတ်ရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
951) “ယြဴခမဳဗြဴမွဲ ကဵုဘာ ကုခမဳဗြဴသအာၚ်တုဲမှ ထေဲပၞတ်သတိုတ် ဟွံမိပ်စိုတ်တုဲ တံၚ်ဓဇက်ပတိတ်လေဝ် တံၚ်ဓဇက်ပတိတ်မ္ဂး၊ ကဵုတံၚ်ဓဇက်ပတိတ်လေဝ် ကဵုတံၚ်ဓဇက်ပတိတ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
