၄.၄.၄။ သိက္ခာပိုဒ်စတုတ္ထ

946) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ ဟွံကၠောန်ၜိုတ်လွဳလွတ်ခမဳဗြဴ ပဒတဴမွဲစွံ မဒှ်ဒဒိုခ်ဂိယဲရ၊ တၞဟ်နပွမကဵုကၠောန်ၜိုတ်လွဳလွတ်လေဝ် ဟွံလွဳပရာရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ အလဵုဇကုလေဝ် ဟွံကၠောန်ၜိုတ်လွဳလွတ် ခမဳဗြဴပဒတဴမွဲစွံ မဒှ်ဒဒိုခ်ဂိယဲရော? တၞဟ်နပွကဵုကၠောန်ၜိုတ်လွဳလွတ်လေဝ် ဟွံလွဳပရာရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ ဟွံကၠောန်ၜိုတ်လွဳလွတ် ခမဳဗြဴပဒတဴမွဲစွံ မဒှ်ဒဒိုက်ဂိယဲရ၊ တၞဟ်နပွကဵုကၠောန် ၜိုတ်လွဳလွတ်လေဝ် ဟွံလွဳပရာရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ ဟွံကၠောန်ၜိုတ်လွဳလွတ် ခမဳဗြဴပဒတဴမွဲစွံ မဒှ်ဒဒိုခ်ဂိယဲရော? တၞဟ်နပွကဵုကၠောန်ၜိုတ် လွဳလွတ်လေဝ် ဟွံလွဳပရာရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

947) “ယြဴခမဳဗြဴမွဲ ဟွံကၠောန်ၜိုတ် ခမဳဗြဴပဒတဴမွဲစွံ မဒှ်ဒဒိုက်မ္ဂး၊ တၞဟ်နပွကဵုကၠောန်ၜိုတ်လေဝ် ဟွံလွဳပရာမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။