၄.၄.၃.၁။ ပွံက်သိက္ခာပိုဒ်တတိယ

943) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ ကုခမဳဗြဴ မ္ဂးဂှ် ကုခမဳဗြဴသအာၚ်။ ဖအောဝ်လလဴစေတနာတုဲ မ္ဂးဂှ် သီုကဵုမတီတဴ သီုကဵုမတီတဴဗွဲမဒးရး သ္ပလွဳတုဲ ဓလီုဍိုက်တုဲ ပွမကလိလောန်ရောၚ်။ သ္ပတဴညံၚ်မဟွံမွဲကဵုတသိုခ်မ္ဂး မ္ဂးဂှ် “နမသ္ပတဴရဴဝွံ ကြက်ကတဵုဒှ် မဟွံမွဲကဵုတသိုခ် ကုခမဳဗြဴဝွံရ” ရဴဝွံ (ပၠုပ်စိုတ်တုဲ) သီုဟွံအာတ်ပါန်အခေါၚ် နူဂတ ကွာ်လေဝ်ကွာ်စၚ်္ကြမ်မ္ဂး၊ ဒတူလေဝ်ဒတူမ္ဂး၊ ဂဇအ်လေဝ်ဂဇအ်မ္ဂး၊ တိက်လေဝ်တိက်မ္ဂး၊ ဗတောန်လေဝ်ဗတောန်မ္ဂး၊ ကဵုဗတောန်လေဝ်ကဵုဗတောန်မ္ဂး၊ ပွမဖ္ဍောဝ်ဗှ်သှ်ၛာယ်လေဝ် သ္ပတဴမ္ဂး၊ ဒးအာပတ်ပဲါစိုတ်ရ။

944) ပ္ဍဲခမဳဗြဴ မၞုံကဵုစၟတ်သမ္တီခမဳဗြဴဒှ်တုဲ သီုမၞုံကဵုစေတနာ သ္ပတဴညံၚ်မဟွံမွဲကဵုတသိုခ်မ္ဂး၊ ဒးအာပတ်ပဲါစိုတ်ရ။ ပ္ဍဲခမဳဗြဴ မၞုံကဵုသၠေဟ်ပၟာတုဲ သီုမၞုံကဵုစေတနာ သ္ပတဴညံၚ်မဟွံမွဲကဵုတသိုခ်မ္ဂး၊ ဒးအာပတ်ပဲါစိုတ်ရ။ ပ္ဍဲခမဳဗြဴ မၞုံကဵုစၟတ်သမ္တီ ဟွံသေၚ်ကဵုခမဳဗြဴဒှ်တုဲသီုမၞုံကဵုစေတနာ သ္ပတဴညံၚ်မဟွံမွဲကဵုတသိုခ်မ္ဂး၊ ဒးအာပတ်ပဲါစိုတ်ရ။ ပ္ဍဲညးဟွံသေၚ်ကဵုခမဳဗြဴ သီုမၞုံကဵုစေတနာ သ္ပတဴညံၚ်မဟွံမွဲကဵုတသိုခ်မ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳဗြဴ မၞုံကဵုစၟတ်သမ္တီခမဳဗြဴမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳဗြဴ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳဗြဴ မၞုံကဵုစၟတ်သမ္တီ ဟွံသေၚ်ကဵုခမဳဗြဴမ္ဂး၊ ဟွံဒးအာပတ်ရ။

945) သီုဟွံမိက်သ္ပတဴ ညံၚ်မဟွံမွဲကဵုတသိုခ် အာတ်ပါန်အခေါၚ်တုဲ နူဂတ ကွာ်လေဝ်ကွာ်စၚ်္ကြမ်မ္ဂး၊ ဒတူလေဝ်ဒတူမ္ဂး၊ ဂဇအ်လေဝ်ဂဇအ်မ္ဂး၊ တိက်လေဝ်တိက်မ္ဂး၊ ဗတောန်လေဝ်ဗတောန်မ္ဂး၊ ကဵုဗတောန်လေဝ်ကဵုဗတောန်မ္ဂး၊ ပွမဖ္ဍောတ်သှ်ၛာယ်လေဝ် သ္ပတဴမ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်တတိယတုဲရ။