၄.၄.၃။ သိက္ခာပိုဒ်တတိယ

941) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ လမိၚ်လညာတ်ဂၠိုၚ်တုဲ ဟီုတွံခိုဟ်ရ၊ တၞဟ်နတွံဓရ် ဂံၚ်သကာတုဲ မၞုံကဵုအစောံသတ္တိရ၊ ဘဒ္ဒါကာပိလာနဳလေဝ် လမိၚ်လညာတ်ဂၠိုၚ်တုဲ ဟီုတွံခိုဟ်ရ၊ တၞဟ်နတွံဓရ် ဂံၚ်သကာတုဲ မၞုံကဵုအစောံသတ္တိရ၊ ညးမပြဲရဴဝွံလေဝ် ဂပ်ဝ်ထိုၚ်သးရ။ မၞိဟ်ဂမၠိုၚ် “နာဲဗြဴဘဒ္ဒါကာပိလာနဳဂှ် လမိၚ်လညာတ်ဂၠိုၚ်တုဲ ဟီုတွံခိုဟ်ရ၊ တၞဟ်နတွံဓရ်လေဝ် ဂံၚ်သကာတုဲ မၞုံကဵုအစောံသတ္တိရ၊ ညးမပြဲရဴဝွံလေဝ် ဂပ်ဝ်ထိုၚ်သးရ” ရဴဝွံ ပြာပ်ခသဳကၠဳ ဘဒ္ဒါကာပိလာနဳ ဗွဲကိုပ်ကၠာတုဲ ပ္ဍဲလက်ကရဴမှ ပြာပ်ခသဳကၠဳ ခမဳဗြဴထုလ္လနန္ဒာအိုတ်ရ။ ခမဳဗြဴထုလ္လနန္ဒာ စောန်စိုတ်ဇၞော်တုဲ “ခမဳဗြဴဂမၠိုၚ် မၞုံကဵုပွမကဵုတီဂၠိုၚ် (လလောၚ်တြး) ပွမထၟံက်ထ္ၜးဂုဏ်ဂၠိုၚ်ဝွံဟေၚ် ပၟိက်အောန်အိုတ်ရဂး တရိုပ်စိုတ်အိုတ်ရဂး လ္ၚုသုန်အိုတ်ရဂး ဟွံမွဲကဵုပွမနှဴရဴအိုတ်ရဂး” ရဴဝွံ (ဟီုသ္ဂးတုဲ) နူဂတ ဘဒ္ဒါကာပိလာနဳ ကွာ်လေဝ်ကွာ်စၚ်္ကြမ်ရ၊ ဒတူလေဝ်ဒတူရ၊ ဂဇအ်လေဝ်ဂဇအ်ရ၊ တိက်လေဝ်တိက်ရ၊ ဗတောန်လေဝ်ဗတောန်ရ၊ ကဵုဗတောန်လေဝ်ကဵုဗတောန်ရ၊ ပွမဖ္ဍောတ်ဗှ်သှ်ၛာယ်လေဝ် သ္ပတဴရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ မၞုံကဵုစေတနာဒှ်တုဲ သ္ပတဴညံၚ်မဟွံမွဲကဵုတသိုခ် ကုနာဲဗြဴဘဒ္ဒါကာပိလာနဳရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ မၞုံကဵုစေတနာဒှ်တုဲ သ္ပတဴညံၚ်ရဴမဟွံမွဲကဵုတသိုခ် ကုခမဳဗြဴဘဒ္ဒါကာပိလာနဳရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ မၞုံကဵုစေတနာဒှ်တုဲ သ္ပတဴညံၚ်မဟွံမွဲကဵုတသိုခ် ကုခမဳဗြဴဘဒ္ဒါကာပိလာနဳရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

942) “ယြဴခမဳဗြဴမွဲ ဖအောဝ်လလဴစေတနာတုဲ သ္ပတဴညံၚ်မဟွံမွဲကဵုတသိုခ် ကုခမဳဗြဴမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴတွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။