၄.၄.၂.၁။ ပွံက်သိက္ခာပိုဒ်ဒုတိယ

938) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴဂမၠိုၚ် မ္ဂးဂှ် ။ ပ ။ သ္ဂးတဴဗြဴမဒှ်ပယျၚ်ဂမၠိုၚ်ရ။ ပ္ဍဲမွဲယာတ်လး မွဲယာတ်လတက်ဓဝ် တိက်တဴညးၜါအိုတ် မ္ဂးဂှ် ယာတ်ဂှ်ဟေၚ်လးတုဲ ယာတ်ဂှ်ဟေၚ် ဓလီုလတက်အိုတ်မ္ဂး၊ ဒးအာပတ်ပဲါစိုတ်ရ။

939) ပ္ဍဲမွဲယာတ်လး မွဲယာတ်လတက်ဓဝ် မၞုံကဵုစၟတ်သမ္တီ မွဲယာတ်လး မွဲယာတ်လတက်ဓဝ်ဒှ်တုဲ တိက်အိုတ်မ္ဂး၊ ဒးအာပတ်ပဲါစိုတ်ရ။ ပ္ဍဲမွဲယာတ်လး မွဲယာတ်လတက်ဓဝ် မၞုံကဵုသၠေဟ်ပၟာဒှ်တုဲ တိက်အိုတ်မ္ဂး၊ ဒးအာပတ်ပဲါစိုတ်ရ။ ပ္ဍဲမွဲယာတ်လး မွဲယာတ်လတက်ဓဝ် မၞုံကဵုစၟတ်သမ္တီ ယာတ်လး ယာတ်လတက်တၞဟ်တၞဟ်ဒှ်တုဲ တိက်အိုတ်မ္ဂး၊ ဒးအာပတ်ပဲါစိုတ်ရ။ ပ္ဍဲမွဲယာတ်လးဓဝ် ယာတ်လတက်တၞဟ်တၞဟ်ဂှ် ဒးအာပတ်ဒုက္ကဋ်ရ၊ ပ္ဍဲမွဲယာတ်လတက်ဓဝ် ယာတ်လးတၞဟ်တၞဟ်မ္ဂး၊ ဒးအာပတ်ဒုက္ကဋ်ရ။ ပ္ဍဲယာတ်လးယာတ်လတက်တၞဟ်တၞဟ် မၞုံကဵုစၟတ်သမ္တီ မွဲယာတ်လးမွဲယာတ်လတက်ဓဝ်မ္ဂး၊ ဒးအာပတ်ဒုက္ကဋ်ရ။ ပ္ဍဲယာတ်လးယာတ်လတက်တၞဟ်တၞဟ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲယာတ်လးယာတ်လတက်တၞဟ်တၞဟ် မၞုံကဵုစၟတ်သမ္တီ ယာတ်လးယာတ်လတက်တၞဟ်တၞဟ်မ္ဂး၊ ဒးအာပတ်ရ။

940) သ္ပအပိုၚ်အခြာတုဲ တိက်အိုတ်မ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ဒုတိယတုဲရ။