၄.၃.၉။ သိက္ခာပိုဒ်နဝမ
920) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ဒကာကၠောန်ၜိုတ်ဥပကာ ခမဳဗြဴထုလ္လနန္ဒာဂှ် “ယွံနာဲဗြဴ ပိုဲဍိက်တအ်ညးဂမၠိုၚ် ယဝ်သၟဟ်ရထမ္ဂး၊ ကြက်ကဵုဒါန်သ္ၚာ ကုဘိက္ခုနဳသၚ်အိုတ်ရ” ရဴဝွံ ဂရၚ်ပတီ ခမဳဗြဴထုလ္လနန္ဒာရ။ ပ္ဍဲအဃောအခိၚ်ဂှ် ခမဳဗြဴဂမၠိုၚ် မဒၠိုက်ကတဵုနူဝှ်တုဲဂှ် မိက်ဂွံပါ်ပရအ်သ္ၚာဂမၠိုၚ်ဒှ်တုဲ ကောံဓရီုအိုတ်ရ၊ ခမဳဗြဴဂမၠိုၚ်တအ် ဩဝ်လၟတ်မၚ်လ္ဇဒၟံၚ်အိုတ်ကၠာညိ၊ အလယ်မစၟဳကေတ်ပ္ဍဲသ္ၚာ နွံကုဘိက္ခုနဳသၚ်ဏီရ” ရဴဝွံ ဟီုသ္ဂးကဵုဘိက္ခုနဳသၚ်ရ။ ခမဳဗြဴဂမၠိုၚ်ဂှ် “ယွံနာဲဗြဴ ဩဝ်အာညိ။ ဩဝ်သ္ပစဵုကဵုမတီ သ္ၚာ (မၞုံကဵုအလယ်မစၟဳကေတ်) ညိ” ရဴဝွံ သ္ဂးကဵုခမဳဗြဴထုလ္လနန္ဒာအိုတ်ရ။ ခမဳဗြဴထုလ္လနန္ဒာ ပြာပ်အာဇရေၚ်ဒကာဂှ်တုဲမ္ဂး “ယွံဒကာတအ် ဩဝ်ကဵုဒါန်သ္ၚာ ကုဘိက္ခုနဳသၚ်အိုတ်ညိ” ရဴဝွံ သ္ဂးကဵုမၞိဟ်ဂမၠိုၚ်ရ။ “ယွံနာဲဗြဴ ပိုဲဍိက်တအ်ညးဂမၠိုၚ် ဟွံသၟဟ်ရထ တၞဟ်နကဵုဒါန်သ္ၚာ ကုဘိက္ခုနဳသၚ်အိုတ်ရ” ရဴဝွံ ဂရၚ်ပတီအိုတ်ရ။ ခမဳဗြဴထုလ္လနန္ဒာ ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ သီုမၞုံကဵုအလယ်သ္ၚာမဍိုန်ကဵုဇြဟတ် သ္ဂောံကဵုကလိလောန်အာ အခိၚ်သ္ၚာရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ သီုမၞုံကဵုအလယ်သ္ၚာ မဍိုန်ကဵုဇြဟတ် ကဵုကလိလောန်အာ အခိၚ်သ္ၚာရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ ပမတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ သီုမၞုံကဵုအလယ်သ္ၚာမဍိုန်ကဵုဇြဟတ် ကဵုကလိလောန်အာ အခိၚ်သ္ၚာရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
921) “ယြဴခမဳဗြဴမွဲ သီုမၞုံကဵုအလယ်သ္ၚာမဍိုန်ကဵုဇြဟတ် ကဵုကလိလောန်အာ အခိၚ်သ္ၚာမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။ ၉။ ပွံက်သိက္ခာပိုဒ်နဝမ
922) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ သီုမၞုံကဵုအလယ်သ္ၚာမဍိုန်ကဵုဇြဟတ် မ္ဂးဂှ် “ယဝ်ပိုဲဍိက်တအ်ညးဂမၠိုၚ် သၟဟ်ရထမ္ဂး၊ ကြက်ကဵုဒါန်သ္ၚာ ကုဘိက္ခုနဳသၚ်အိုတ်ရ” ရဴဝွံ ဟီုမြော်တိတ်ပါၚ်ရ။ အခိၚ်သ္ၚာ မ္ဂးဂှ် ဟွံလလးကထိုန်မ္ဂး လအိတ်ဂိတုဗြဲမွဲဂိတု၊ လလးကထိုန်မ္ဂး မသုန်ဂိတု။ ကဵုကလိလောန်အာ အခိၚ်သ္ၚာ မ္ဂးဂှ် ဟွံလလးကထိုန်မ္ဂး ကဵုကလိလောန်အာ တ္ၚဲလအိတ်အိုတ်ဂိတုဗြဲမ္ဂး၊ ဒးအာပတ်ပဲါစိုတ်ရ။ လလးကထိုန်မ္ဂး ကဵုကလိလောန်အာ တ္ၚဲပိုက်ကၠေံကထိုန်မ္ဂး၊ ဒးအာပတ်ပဲါစိုတ်ရ။
923) ပ္ဍဲအလယ်သ္ၚာမဍိုန်ကဵုဇြဟတ် မၞုံကဵုစၟတ်သမ္တီ အလယ်သ္ၚာဍိုန်ကဵုဇြဟတ်ဒှ်တုဲ ကဵုကလိလောန်အာ အခိၚ်သ္ၚာမ္ဂး၊ ဒးအာပတ်ပဲါစိုတ်ရ။ ပ္ဍဲအလယ်သ္ၚာမဍိုန်ကဵုဇြဟတ် မၞုံကဵုသၠေဟ်ပၟာဒှ်တုဲ ကဵုကလိလောန်အာ အခိၚ်သ္ၚာမ္ဂး၊ ဒးအာပတ်ဒုက္ကဋ်ရ။ ပ္ဍဲအလယ်သ္ၚာ မဍိုန်ကဵုဇြဟတ် မၞုံကဵုစၟတ်သမ္တီ အလယ်သ္ၚာဟွံဍိုန်ကဵုဇြဟတ်ဒှ်တုဲ ကဵုကလိလောန်အာ အခိၚ်သ္ၚာမ္ဂး၊ ဟွံဒးအာပတ်ရ။ ပ္ဍဲအလယ်သ္ၚာမဟွံဍိုန်ကဵုဇြဟတ် မၞုံကဵုစၟတ်သမ္တီ အလယ်သ္ၚာဍိုန်ကဵုဇြဟတ်မ္ဂး၊ ဒးအာပတ်ဒုက္ကဋ်ရ။ ပ္ဍဲအလယ်သ္ၚာမဟွံဍိုန်ကဵုဇြဟတ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအလယ်သ္ၚာမဟွံဍိုန်ကဵုဇြဟတ် မၞုံကဵုစၟတ်သမ္တီ အလယ်သ္ၚာဟွံဍိုန်ကဵုဇြဟတ်မ္ဂး၊ ဟွံဒးအာပတ်ရ။
924) ထ္ၜးကဵုဖဵုအာနိသံသတုဲ ဆေဝ်ဒဝ်မ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်နဝမတုဲရ။
