၄.၃.၈။ သိက္ခာပိုဒ်အဋ္ဌမ

916) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ “ဩဝ်ဟီုထိုၚ်သးဂုဏ်အဲ ပ္ဍဲလဒေါဝ်ပရိသာတ်အိုတ်ညိ” ရဴဝွံ (သ္ဂးတုဲ) ကဵုတဴသ္ၚာ (အရပ်စပ်) ခမဳ ကုညးဟီုလှေ် သၟာလှေ်ဂမၠိုၚ် ကေုာံသၟာဗတက်ဆေလုန် သၟာဒၠုမတ် သၟာဓဗိုန်ဓာပ်ဂမၠိုၚ်ရ။ ညးကဵုလှေ် သၟာလှေ်ဂမၠိုၚ် ကေုာံသၟာဗတက်ဆေလုန် သၟာဒၠုမတ် သၟာဓဗိုန်ဓာပ်ဂမၠိုၚ်ဂှ် “နာဲဗြဴထုလ္လနန္ဒာ လမိၚ်လညာတ်ဂၠိုၚ်တုဲ ဟီုတွံခိုဟ်ရ၊ တၞဟ်နတွံဓရ် ဂံၚ်သကာတုဲ မၞုံကဵုအစောံသတ္တိရ၊ ဩဝ်ကဵုဒါန် ကုနာဲဗြဴထုလ္လနန္ဒာအိုတ်ညိ၊ ဩဝ်သ္ပရှေ်သှေ်ရဴဂဴ ပ္ဍဲနာဲဗြဴထုလ္လနန္ဒာအိုတ်ညိ” ရဴဝွံ ဟီုထိုၚ်သးဂုဏ် ခမဳဗြဴထုလ္လနန္ဒာ ပ္ဍဲလဒေါဝ်ပရိသာတ်အိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ ကဵုတဴသ္ၚာ (အရပ်စပ်) ခမဳ ကုခရှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ ကဵုတဴသ္ၚာ (အရပ်စပ်) ခမဳ ကုခရှ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ ကဵုတဴသ္ၚာ (အရပ်စပ်) ခမဳ ကုခရှ်ရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

917) “ယြဴခမဳဗြဴမွဲ ကဵုတဴသ္ၚာ (အရပ်စပ်) ခမဳ ကုခရှ်ကီု ကုပြဘာဇ်တြုံကီု ကုပြဘာဇ်ဗြဴကီုမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။