၄.၃.၇။ သိက္ခာပိုဒ်သတ္တမ

911) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် သ္ၚာဟွံသေၚ်ကဵုအခိၚ် ကတဵုဒှ်ကၠုၚ်ကုဘိက္ခုနဳသၚ်ရ။ ပ္ဍဲအခိၚ်ဂှ် ဘိက္ခုနဳသၚ် မိက်ဂွံပါ်ပရအ်သ္ၚာဂှ်တုဲ ကောံဓရီုရ။ ပ္ဍဲအဃောအခိၚ်ဂှ် ခမဳဗြဴဂမၠိုၚ်မဒှ်ကွးပဒတဴဇရေၚ် ခမဳဗြဴထုလ္လနန္ဒာ ပဲါစ္ဍးအာဒၟံၚ်ဌာန်သအာၚ်အိုတ်ရ။ ခမဳဗြဴထုလ္လနန္ဒာ “ယွံနာဲဗြဴတအ် ခမဳဗြဴသအာၚ်ဂမၠိုၚ် ဒှ်ဃောပဲါစ္ဍးအာဒၟံၚ်ဌာန်သအာၚ်တုဲ ဟွံထေက်ကဵုပါ်ပရအ်သ္ၚာဏီရ” ရဴဝွံ သ္ဂးတုဲ ဆေဝ်ဒဝ်ကၠေံ ပွမပါ်ပရအ်သ္ၚာ ကုခမဳဗြဴဂမၠိုၚ်ဂှ်ရ။ ခမဳဗြဴသအာၚ်ဂမၠိုၚ် ဟွံပါ်ပရအ်သ္ၚာဏီရ ရဴဝွံ ပၠုပ်စိုတ်တုဲ ပဲါစ္ဍးအာဌာန်သအာၚ်အိုတ်ရ။ ခမဳဗြဴထုလ္လနန္ဒာဂှ် ခမဳဗြဴမဒှ်ကွးပဒတဴဇရေၚ်ဂမၠိုၚ် ကလေၚ်စိုပ်ကၠုၚ်မ္ဂး ကဵုပါ်ပရအ်သ္ၚာရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ ဆေဝ်ဒဝ်ကၠေံ ပွမပါ်ပရအ်သ္ၚာ မဗဗွဲကုဓရ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာဆေၚ်ဒဝ်ကၠေံ ပွမပါ်ပရအ်သ္ၚာ မဗဗွဲကုဓရ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ ဆေဝ်ဒဝ်ကၠေံ ပွမပါ်ပရအ်သ္ၚာ မဗဗွဲကုဓရ်ရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်းဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

912) “ယြဴခမဳဗြဴမွဲ ဆေဝ်ဒဝ်ကၠေံ ပွမပါ်ပရအ်သ္ၚာ မဗဗွဲကုဓရ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။