၄.၃.၅။ သိက္ခာပိုဒ်ပဉ္စမ

902) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴမွဲဇကု ဂေတ်ဂ္ၚေၚ်ပိဏ္ဍပါတ်တုဲ ပၠးစဲလဝ် သ္ၚာမဍေက်တုဲ လုပ်အာဘာရ၊ ခမဳဗြဴသအာၚ်မွဲဇကု သၠောံရုၚ်လတက်ဏာ သ္ၚာဂှ်တုဲ လုပ်ဂ္ၚေၚ်ပိဏ္ဍပါတ် အပ္ဍဲကွာန်ရ။ ခမဳဗြဴတၠသ္ၚာဂှ် တိတ်ကၠုၚ်တုဲ “ယွံနာဲဗြဴတအ် ညာတ်တဴသ္ၚာအဲဍိက်အိုတ်ဟာ” ရဴဝွံ သၟာန်ခမဳဗြဴသအာၚ်ဂမၠိုၚ်ရ။ ခမဳဗြဴသအာၚ်ဂမၠိုၚ် ဟီုလဴဗ္စ ဟိုတ်ပရူပရာဝွံ ကုခမဳဗြဴဂှ်အိုတ်ရ။ ခမဳဗြဴတၠသ္ၚာဂှ် “မုဟိုတ် ခမဳဗြဴဂှ် သီုဟွံဂရၚ်ပတီလဴဗ္စ သ္ဂောံဗိုက်လတက်ဏာ သ္ၚာအဲရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဗြဴဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်၈မၠိုၚ်ဂှ် “မုဟိုတ် ခမဳဗြဴဂှ် သီုဟွံဂရၚ်ပတီလဴဗ္စ ဗိုက်လတက်ဏာ သ္ၚာခမဳဗြဴသအာၚ်ရော?” ရဴဝွံ ဟီုဂရိုဟ်အိုတ်၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ ယွံခမဳတအ် ခမဳဗြဴဂှ် သီုဟွံဂရၚ်ပတီလဴဗ္စ ဗိုက်လတက်ဏာ သ္ၚာခမဳဗြဴသအာၚ်ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

903) “ယြဴခမဳဗြဴမွဲ ပကၚ်ရၚ်သ္ၚာညးသအာၚ် မပြံၚ်လှာဲ ‘မဒးကလေၚ်ကဵု’ မ္ဂး (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။