၄.၃.၃.၁။ ပွံက်သိက္ခာပိုဒ်တတိယ
894) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ သ္ၚာ မ္ဂးဂှ် ပၞောဝ်သ္ၚာဂမၠိုၚ်တြဴဂတှေ် သ္ၚာမွဲမွဲဂတှေ်ရောၚ်။ သှ်ပၠိုဟ်ကၠေံဇၟန်ဇုက်တုဲ မ္ဂးဂှ် အလဵုဇကုလလိုဟ်ကၠေံဇၟန်ဇုက်တုဲ။ ဖအောဝ်ကဵုသှ်ပၠိုဟ်ကၠေံဇၟန်ဇုက်တုဲ မ္ဂးဂှ် ဖအောဝ်ကဵုညးသအာၚ်လလိုဟ်ကၠေံဇၟန်ဇုက်တုဲ။ သွက်ဂွံဖအောဝ်ကဵုဇိၚ်လေဝ် ဟွံသ္ပလွဳပရာ မ္ဂးဂှ် ဟွံဖအောဝ်စကာညးသအာၚ်မ္ဂး။ ဝေၚ်ကၠေံပန်မသုန်တ္ၚဲတုဲ မ္ဂးဂှ် ပဲါကၠေံပန်မသုန်တ္ၚဲတုဲ။ “အလဵုဇကုလေဝ် ကြက်ဟွံဇိၚ်ရ၊ ညးသအာၚ်လေဝ် သွက်ဂွံကဵုဇိၚ် ကြက်ဟွံသ္ပလွဳပရာ ရ” ရဴဝွံ ပ္ဍဲအယာံမာတ်ဖျေံကၠေံလျိုၚ်ဂှ် ဒးအာပတ်ပဲါစိုတ်ရ။
895) ပ္ဍဲခမဳဗြဴ မၞုံကဵုစၟတ်သမ္တီဒှ်တုဲ သှ်ပၠိုဟ်ကၠေံ ဇၟန်ဇုက်သ္ၚာတုဲကီု ဖအောဝ်ကဵုသှ်ပၠိုဟ်ကၠေံတုဲကီု ခမဳဗြဴဂှ် ပ္ဍဲကာလကြဴ သီုဟွံမွဲကဵုအန္တရာယ် ဝေၚ်ကၠေံပန်တ္ၚဲ,မသုန်တ္ၚဲတုဲ (အလဵုဇကုလေဝ်) ဟွံဇိၚ်မ္ဂး သွက်ဂွံဖအောဝ်ကဵု (ညးသအာၚ်) ဇိၚ်လေဝ် ဟွံသ္ပလွဳပရာမ္ဂး၊ ဒးအာပတ်ပဲါစိုတ်ရ။ ပ္ဍဲခမဳဗြဴ မၞုံကဵုသၠေဟ်ပၟာတုဲ သှ်ပၠိုဟ်ကၠေံ ဇၟန်ဇုက်သ္ၚာတုဲကီု ဖအောဝ်ကဵုသှ်ပၠိုဟ်ကၠေံတုဲကီု ခမဳဗြဴဂှ် ပ္ဍဲကာလကြဴ သီုဟွံမွဲကဵုနန္တရာယ် ဝေၚ်ကၠေံပန်တ္ၚဲ,မသုန်တ္ၚဲတုဲ (အလဵုဇကုလေဝ်) ဟွံဇိၚ်မ္ဂး၊ သွက်ဂွံဖအောဝ်ကဵု (ညးသအာၚ်) ဇိၚ်လေဝ် ဟွံသ္ပလွဳပရာမ္ဂး၊ ဒးအာပတ်ပဲါစိုတ်ရ။ ပ္ဍဲခမဳဗြဴ မၞုံကဵုစၟတ်သမ္တီဟွံသေၚ်ကဵုခမဳဗြဴဒှ်တုဲသှ်ပၠိုဟ်ကၠေံ ဇၟန်ဇုက်သ်ၚာတုဲကီု ဖအောဝ်ကဵုသှ်ပၠိုဟ်ကၠေံတုဲကီု ခမဳဗြဴဂှ် ပ္ဍဲကာလကြဴ သီုဟွံမွဲကဵုအန္တရာယ် ဝေၚ်ကၠေံပန်တ္ၚဲ,မသုန်တ္ၚဲတုဲ (အလဵုဇကုလေဝ်) ဟွံဇိၚ်မ္ဂး၊ သွက်ဂွံဖအောဝ်ကဵု (ညးသအာၚ်) ဇိၚ်လေဝ် ဟွံသ္ပလွဳပရာမ္ဂး၊ ဒးအာပတ်ပဲါစိုတ်ရ။ သှ်ပၠိုဟ်ကၠေံ ပရိက္ခရာသအာၚ်တုဲကီု ဖအောဝ်ကဵုသှ်ပၠိုဟ်ကၠေံတုဲကီု ခမဳဗြဴဂှ် ပ္ဍဲကာလကြဴ သီုဟွံမွဲကဵုအန္တရာယ် ဝေၚ်ကၠေံပန်တ္ၚဲ,မသုန်တ္ၚဲတုဲ (အလဵုဇကုလေဝ်) ဟွံဇိၚ်မ္ဂး၊ သွက်ဂွံဖအောဝ်ကဵု (ညးသအာၚ်) ဇိၚ်လေဝ် ဟွံသ္ပလွဳပရာမ္ဂး၊ ဒးအာပတ်ဒုက္ကဋ်ရ။ သှ်ပၠိုဟ်ကၠေံ သ္ၚာကီု ပရိက္ခရာသအာၚ်ကီု ညးဟွံသေၚ်ကဵုခမဳဗြဴတုဲကီု ဖအောဝ်ကဵုသှ်ပၠိုဟ်ကၠေံတုဲကီု ခမဳဗြဴဂှ် ပ္ဍဲကာလကြဴ သီုဟွံမွဲကဵုနန္တရာယ် ဝေၚ်ကၠေံပန်တ္ၚဲ,မသုန်တ္ၚဲတုဲ (အလဵုဇကုလေဝ်) ဟွံဇိၚ်မ္ဂး၊ သွက်ဂွံဖအောဝ်ကဵု (ညးသအာၚ်) ဇိၚ်လေဝ် ဟွံသ္ပလွဳပရာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳဗြဴ မၞုံကဵုစၟတ်သမ္တီခမဳဗြဴမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳဗြဴ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳဗြဴ မၞုံကဵုစၟတ်သမ္တီဟွံသေၚ်ကဵု ခမဳဗြဴမ္ဂး၊ ဟွံဒးအာပတ်ရ။
896) အန္တရာယ်နွံမ္ဂး၊ ဂၠာဲသ္ၚေဝ်တုဲ ဟွံကလိဂွံမ္ဂး၊ ဃောကၠောန်သ္ပဒၟံၚ် ကဵုကလိလောန်အာ ပန်တ္ၚဲ,မသုန်တ္ၚဲမ္ဂး၊ ဟွံဒးအာပတ်ရ၊ ကုခမဳဗြဴဂိယဲလေဝ် ဟိုတ်နူပရိုက်ဘဲဂမၠိုၚ်လေဝ်၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်တတိယတုဲရ။
