၄.၃.၃။ သိက္ခာပိုဒ်တတိယ

892) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴမွဲဇကုဂှ် ယာတ်သ္ၚာဂှ် သီုမထေက်ကဵုၚုဟ်မးမဂၠိုၚ် သ္ၚာဂှ်တုန် ဇိၚ်လဝ်ဗွဲမပရေအ်ဇရ။ ခမဳဗြဴထုလ္လနန္ဒာဂှ်— “ယွံနာဲဗြဴ ယာတ်သ္ၚာတၠအဲဂှ် ခိုဟ်ဆာဲရ၊ ၜိုန်ဂှ် သ္ၚာဂှ်တုန် ဇိၚ်လဝ်ဗွဲမပရေအ်ဇရ” ရဴဝွံ သ္ဂးကဵုခမဳဗြဴဂှ်ရ။ ယွံနာဲဗြဴ သှ်ပၠိုဟ်လလိုဟ်ကၠေံ ဇၟန်ဇုက်ရ၊ ဇိၚ်ကဵုဟာ ရဴဝွံ (သၟာန်ရ)။ ယွံနာဲဗြဴ (ယွံ) ဇိၚ်ကဵုရ ရဴဝွံ (သ္ဂးရ)။ ပ္ဍဲအခိၚ်ဂှ် ခမဳဗြဴဂှ် သှ်ပၠိုဟ်လလိုဟ်ကၠေံ ဇၟန်ဇုက်တုဲပ္ဍဲကြဴ ကဵုကုခမဳဗြဴထုလ္လနန္ဒာရ။ ခမဳဗြဴထုလ္လနန္ဒာဂှ် “ကြက်ဇိၚ်ကဵုရ၊ ကြက်ဇိၚ်ကဵုရ” ရဴဝွံ သီုမသ္ဂးတဴဇိၚ်လေဝ်ဇိၚ်ရ၊ သွက်ဂွံဇိၚ်လေဝ် ဟွံသ္ပလွဳပရာရ၊ ပ္ဍဲအခိၚ်ဂှ် ခမဳဗြဴဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴသအာၚ်ဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ ဖအောဝ်စကာကဵုသှ်ပၠိုဟ်လလိုဟ်ကၠေံ ဇၟန်ဇုက်သ္ၚာခမဳဗြဴတုဲမှ ဇိၚ်လေဝ်ဟွံဇိၚ်ရော? သွက်ဂွံဇိၚ်လေဝ် ဟွံသ္ပလွဳပရာရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ ဖအောဝ်စကာကဵုသှ်ပၠိုဟ်လလိုဟ်ကၠေံ ဇၟန်ဇုက်သ္ၚာ ခမဳဗြဴတုဲမှ ဇိၚ်လေဝ်ဟွံဇိၚ်ရ၊ သွက်ဂွံဇိၚ်လေဝ် ဟွံသ္ပလွဳပရာဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ ဖအောဝ်စကာကဵုသှ်ပၠိုဟ်လလိုဟ်ကၠေံ ဇၟန်ဇုက်သ္ၚာခမဳဗြဴတုဲမှ ဇိၚ်လေဝ်ဟွံဇိၚ်ရော? သွက်ဂွံဇိၚ်လေဝ် ဟွံသ္ပလွဳပရာရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴ စၞောန်ထ္ၜးသိက္ခာပိုဒ်ဝွံအိုတညိ။

893) “ယြဴခမဳဗြဴမွဲ သှ်ပၠိုဟ်ကၠေံ ဇၟန်ဇုက်သ္ၚာခမဳဗြဴတုဲကီု ဖအောဝ်ကဵုသှ်ပၠိုဟ်ကၠေံတုဲကီု ပ္ဍဲကာလကြဴ သီုဟွံမွဲကဵုအန္တရာယ် ဝေၚ်ကၠေံပန်မသုန်တ္ၚဲတုဲ (အလဵုဇကုလေဝ်) ဟွံဇိၚ်မ္ဂး၊ သွက်ဂွံဖအောဝ်ကဵု (ညးသအာၚ်) ဇိၚ်လေဝ် ဟွံသ္ပလွဳပရာမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။