၄.၃.၂.၁။ ပွံက်သိက္ခာပိုဒ်ဒုတိယ

889) သၞုက်ဍာ် မ္ဂးဂှ် ဗိုက်တုဲယာတ်မဒးဟုမ်ဍာ်ရောၚ်။ ခမဳဗြဴမမိက်ကဵုခၞံ မ္ဂးဂှ် ခမဳဗြဴမခၞံကီု ခမဳဗြဴမဖအောဝ်ကဵုခၞံကီု သ္ဒးခၞံသၞုက်ဍာ် မစိုန်သကီုကေုာံဗၞတ်ဗ္ၜတ်ရ၊ ပ္ဍဲအရာသၞုက်ဍာ်ဂှ် ကြက်သ္ဂးဂတဝွံတုန် ဗၞတ်ဗ္ၜတ်ရောၚ်။ နဍစၞိန်တဲကျာ် ဇမၠိၚ်ပန်ဍ အနာံၜါဍဂမၠိုၚ်ရောၚ်၊ ကဵုကလိလောန်ဗၞတ်ဗ္ၜတ်ဂှ်တုဲ ခၞံလေဝ်ခၞံမ္ဂး၊ ဖအောဝ်လေဝ်ဖအောဝ်ကဵုခၞံမ္ဂး၊ ဟိုတ်ပယောဂလွဳပရာ၊ ဒးအာပတ်ဒးဒုက္ကဋ်ရ။ ဟိုတ်နူပွမကလိဂွံကုတ်ကၠေံတုဲ ဒးဟီုလၟိၚ်ဒေသနာ အာပတ်ပဲါစိုတ်ရ။

890) အလဵုဇကု ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်ပဲါစိုတ်ရ။ အလဵုဇကု ခၞံလဝ်ဟွံစိုပ်ဒတုဲဏီတုဲ ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်ပဲါစိုတ်ရ။ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်ပဲါစိုတ်ရ။ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်ပဲါစိုတ်ရ။ တၞဟ်နသွက်ညးသအာၚ် ခၞံလေဝ်ကၠောန်ခၞံမ္ဂး၊ ဖအောဝ်လေဝ် ဖအောဝ်ကဵုကၠောန်ခၞံမ္ဂး၊ ဒးအာပတ်ပတ်ဒုက္ကဋ်ရ။ ကလိဂွံညးသအာၚ်ခၞံလဝ်တုဲ ပြဘိုဂ်သုၚ်စောဲမ္ဂး၊ ဒးအာပတ်ဒုက္ကဋ်ရ။

891) ကၠောန်ခၞံသၞုက်ဍာ် မစိုန်သကီုကေုာံဗၞတ်ဗ္ၜတ်မ္ဂး၊ ကၠောန်ခၞံသၞုက်ဍာ် ယုတ်ဒေက်သၟဝ် ဗၞတ်ဗ္ၜတ်မ္ဂး၊ ကလိဂွံသၞုက်ဍာ် မလောန်လတူဗၞတ်ဗ္ၜတ် ညးသအာၚ်ခၞံလဝ်တုဲဂှ် ကုတ်ကၠေံတုဲ ပြဘိုဂ်သုၚ်စောဲမ္ဂး ကၠောန်ခၞံ သၠဖ္ဍာန်ကီု သၞာလးတိကီု ယာတ်သၞိက်ကီု ဖုန်ကီု ဂၞဳကီုမ္ဂး၊ ဟွံဒး အာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတုဲဂှ် ဟွံဒးအာပတ်ရ။ သိက္ခာပိုဒ်ဒုတိယတုဲရ။