၄.၃.၁။ သိက္ခာပိုဒ်ပဌမ

883) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ်ဗွဲမဂၠိုၚ် သီုမဂၞံၚ်ဂၞါတ်ဇကုသၟး (ဟၟဲကဵုဗွိုက်လတက်) ဟုမ်ဍာ်ပ္ဍဲကြုၚ်အစိရဝတဳ မွဲဟာန်ကေုာံ ဗြဴစရာဲဍုၚ်ဂမၠိုၚ် ပ္ဍဲမွဲသၞေဟ်ဓဝ်အိုတ်ရ။ ဗြဴစရာဲဍုၚ်ဂမၠိုၚ် “ယွံနာဲဗြဴတအ် နပွမဒ္ဂေတ်တဴ ဒ္ဂေတ်မပြဲ ကုနာဲဗြဴတအ်ညးဂမၠိုၚ် မဒှ်ညးအဝယ်ဍောတ်သွတ်ဂှ် မုဖဵုမၞုံရော? ထေက်ကဵုဒုၚ်စသိုၚ်တသိုခ်ကာမဂုဏ်ရ ဟွံသေၚ်ဟာ၊ ပ္ဍဲအခိၚ်မဗျုထဴတေံ ကြက်သ္ဒးဒ္ဂေတ်လ္ၚတ် ဒ္ဂေတ်မပြဲအိုတ်ရ၊ ဒ္ဂေတ်တဴရဴဝွံမ္ဂး ကုမၞးတအ်ညးဂမၠိုၚ် သ္ဂောံသီထၜေါဝ်ကေတ် ဒတုဲဖဵုဂမၠိုၚ်ၜါပြကာအိုတ်ရ” ရဴဝွံ သ္ပဂရိုၚ်စရဵုဟီုဗျံက်ဂှ်ရ မုက်မတ်ဟွံကျေဝ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ် အာဘာတုဲ ဟီုလဴဗ္စ ဟိုတ်ပရူပရာဝွံ ကုခမဳဗြဴသအာၚ်ဂမၠိုၚ်အိုတ်ရ။ ခမဳဗြဴဂမၠိုၚ် ဟီုလဴဗ္စ ဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ။ ခမဳတြုံဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ဟီုတွံကဵုဂလာန်ဓရ်တုဲ ယွံခမဳတအ် ဒှ်သာ်ဂှ်မ္ဂး သ္ပဟိုတ်ကဵု ဖဵုတၟေၚ်ဂမၠိုၚ်စှ်ပြကာမတွံဂး (၁) သွက်သ္ဂောံ ဒ္ဂေတ်လ္ၚတ်ဒုၚ်ဝန်မ္ဂး ဒးရးသန်ရ ဒဒက်တဴကဵုသၚ် ။ ပ ။ (၁၀) သွက်ဂွံယိုက်ဒိုက် ‘ဝိနယ်’ စေဝ်ပၞောန်တုဲ ပညပ်တဴသိက္ခာပိုဒ် ကုခမဳဗြဴဂမၠိုၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

884) “ယြဴခမဳဗြဴမွဲ သီုမဂၞံၚ်ဂၞါတ်လဝ်ဇကုသၟး ဟုမ်ဍာ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။