၄.၂.၉။ သိက္ခာပိုဒ်နဝမ

874) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ် ဟွံညာတ်ကေတ် ကပေါတ်ဂြပ်ဇကုတအ်ဂမၠိုၚ်ဒှ်တုဲ “ယွံနာဲဗြဴ ဟွံညာတ်တဴ ကပေါတ်ဂြပ်ပိုဲညးဂမၠိုၚ်ဟာ” ရဴဝွံ သၟာန်ခမဳဗြဴစဏ္ဍကာဠဳရ၊ ခမဳဗြဴစဏ္ဍကာဠဳဂှ် “အဲ ကမၠတ်ဗြဴဟာ၊ အဲ အလဇ္ဇဳဗြဴဟာ၊ နာဲဗြဴဂမၠိုၚ် မဟွံညာတ်ကေတ် ကပေါတ်ဂြပ်ဇကုဂှ် ‘ယွံနာဲဗြဴ ဟွံညာတ်တဴ ကပေါတ်ဂြပ်ပိုဲညးဂမၠိုၚ်ဟာ’ ရဴဝွံ သၟာန်တဴအဲအိုတ်ရ၊ ယွံနာဲဗြဴတအ် အဲ ယဝ်ဂိုၚ်ကၠတ်ဒး ကပေါတ်ဂြပ်မၞးတအ်ညးဂမၠိုၚ်မ္ဂး၊ ကဵုဂွံဒှ် ညးဟွံသေၚ်ကဵုခမဳဗြဴညိ၊ ကဵုဂွံတသိုတ်အာ နူသာသနာညိ၊ ကဵုဂွံကတဵုဒှ် ပ္ဍဲနရက်ညိ၊ ခမဳဗြဴ မဟီုသ္ဂးကဵုအဲ ဟွံဍာံစၟတ် ရဴဝွံလေဝ် ကဵုဂွံဒှ် ညးဟွံသေၚ်ကဵုခမဳဗြဴညိ၊ ကဵုဂွံတသိုတ်အာ နူသာသနာညိ၊ ကဵုဂွံကတဵုဒှ် ပ္ဍဲနရက်ညိ” ရဴဝွံ (ချဴတုဲ) ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴစဏ္ဍကာဠဳ ချဴတဴဇကုဇကုကီု ညးသအာၚ်ကီု နကဵုနရက်ကီု နကဵုသာသနာကီုရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴစဏ္ဍကာဠဳ ချဴတဴဇကုဇကုကီု ညးသအာၚ်ကီု နကဵုနရက်ကီု နကဵုသာသနာကီုရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴစဏ္ဍကာဠဳ ချဴတဴဇကုဇကုကီု ညးသအာၚ်ကီု နကဵုနရက်ကီု နကဵုသာသနာကီုရော? ယွံခမဳတအ် (ကမၠောန်ပွခမဳဗြဴစဏ္ဍကာဠဳသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

875) “ယြဴခမဳဗြဴမွဲ ချဴတဴဇကုဇကုကီု ညးသအာၚ်ကီု နကဵုနရက်ကီု နကဵုသာသနာကီုမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။