၄.၂.၇။ သိက္ခာပိုဒ်သတ္တမ
864) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ်ဗွဲမဂၠိုၚ် အာတဴဍုၚ်သာရဝှ် ပ္ဍဲဇနပိုဒ်ကောသလရးဂမၠိုၚ်မ္ဂး ပ္ဍဲအခိၚ်သဝ်တ္ၚဲ စိုပ်အာကွာန်မွဲကွာန်အိုတ်တုဲ ပြာပ်အာဇရေၚ် သ္ၚိဗဗၞးမွဲတုဲမ္ဂး အာတ်အခေါၚ်တိက်အိုတ်ရ။ ပ္ဍဲအခိၚ်ဂှ် ဗဗၞးဗြဴဂှ် “ယွံနာဲဗြဴတအ် စဵုကဵုဗဗၞးကလေၚ်စိုပ်ကၠုၚ် ဩဝ်သၟတ်မၚ်လ္ဇအိုတ်ညိ” ရဴဝွံ ဂရၚ်ပတီခမဳဗြဴဂမၠိုၚ်ရ။ ခမဳဗြဴဂမၠိုၚ် “စဵုကဵုဗဗၞးကလေၚ်စိုပ်ကၠုၚ် လၟတ်မၚ်လ္ဇဒၟံၚ်ရ” ရဴဝွံ လးပၠးသၞာသတိက်တုဲ လ္ၚဵုဂှ်ဂဇအ်တုဲ လ္ၚဵုဂှ်တိက်ဒၟံၚ်အိုတ်ရ။ ပ္ဍဲကြဴနူဂှ် ဗဗၞးဂှ် ကၠုၚ်စိုပ်ပ္ဍဲအခိၚ်ဗ္တံတုဲ “ဗြဴဂမၠိုၚ်ဝွံ ညးလဵုအိုတ်ရော?” ရဴဝွံ သၟာန်ဗဗၞးဗြဴဂှမ္ဂး ယွံနာဲပိုဲ ခမဳဗြဴဂမၠိုၚ်ရ ရဴဝွံ သ္ဂးရ။ “ဩဝ်ဗက်ဗ္ဒဴပတိတ် ဗြဴက္ဍိုပ်တ္ၚာတ် ပလီုဂကူဂမၠိုၚ်အိုတ်ညိ” ရဴဝွံ သ္ဂးတုဲ ဗက်ပတိတ်နူသ္ၚိရ။ ပ္ဍဲအခိၚ်ဂှ် ခမဳဗြဴဂမၠိုၚ် အာစိုပ်ဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် ပ္ဍဲအခိၚ်သဝ်တ္ၚဲ ပြာပ်စဴအာ သ္ၚိဒကာဂမၠိုၚ်တုဲ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ် လးသၞာသတိက်သၞာဒၟံၚ်တုဲမ္ဂး ဂဇအ်လေဝ်ဂဇအ်အိုတ်ရော? တိက်လေဝ်တိက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် လးသၞာသတိက်သၞာဒၟံၚ်တုဲမ္ဂး ဂဇအ်လေဝ်ဂဇအ်အိုတ်ရ၊ တိက်လေဝ်တိက်အိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် ပ္ဍဲအခိၚ်သဝ်တ္ၚဲ ပြာပ်စဴအာ သ္ၚိဒကာဂမၠိုၚ်တုဲ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ် လးသၞာသတိက်သၞာဒၟံၚ်တုဲမ္ဂး ဂဇအ်လေဝ်ဂဇအ်အိုတ်ရော? တိက်လေဝ်တိက်အိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
865) “ယြဴခမဳဗြဴမွဲ ပ္ဍဲအခိၚ်သဝ်တ္ၚဲ ပြာပ်စဴအာ သ္ၚိဒကာဂမၠိုၚ်တုဲ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ် လးသၞာသတိက်သၞာဒၟံၚ်တုဲကီု ဖအောဝ်ကဵုလးတုဲကီု ဂဇအ်လေဝ်ဂဇအ်မ္ဂး၊ တိက်လေဝ်တိက်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ။” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
