၄.၂.၆။ သိက္ခာပိုဒ်ဆဋ္ဌ

859) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ ပ္ဍဲအခိၚ်တ္ၚဲစေၚ် ပြာပ်စဴအာ သ္ၚိဒကာဂမၠိုၚ်တုဲ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ် ဂဇအ်လေဝ်ဂဇအ် ပ္ဍဲသၞာဂဇအ်ရ၊ တိက်လေဝ်တိက်ရ။ မၞိဟ်ဂမၠိုၚ် ဂွဂၠေံညှာကဵုခမဳဗြဴထုလ္လနန္ဒာဂမၠိုၚ်ဒှ်တုဲ ဂဇအ်လေဝ်ဟွံဂဇအ် ပ္ဍဲသၞာဂဇအ်အိုတ်ရ၊ တိက်လေဝ် ဟွံတိက်အိုတ်ရ။ မၞိဟ်ဂမၠိုၚ် “မုဟိုတ် နာဲဗြဴထုလ္လနန္ဒာ ပ္ဍဲအခိၚ်တ္ၚဲစေၚ် ပြာပ်စဴအာ သ္ၚိဒကာဂမၠိုၚ်တုဲ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ် ဂဇအ်လေဝ်ဂဇအ် ပ္ဍဲသၞာဂဇအ်ရော? တိက်လေဝ် တိက်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဗြဴဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ ပ္ဍဲအခိၚ်တ္ၚဲစေၚ် ပြာပ်စဴအာ သ္ၚိဒကာဂမၠိုၚ်တုဲ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ် ဂဇအ်လေဝ်ဂဇအ် ပ္ဍဲသၞာဂဇအ်ရော? တိက်လေဝ် တိက်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ ပ္ဍဲအခိၚ်တ္ၚဲစေၚ် ပြာပ်စဴအာ သ္ၚိဒကာဂမၠိုၚ်တုဲ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ် ဂဇအ်လေဝ်ဂဇအ် ပ္ဍဲသၞာဂဇအ်ရ၊ တိက်လေဝ်တိက်ရ ဟီုဂှ် ဍာံပြရဟာ” ရဴဝွံ စၟတ်စၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ ပ္ဍဲအခိၚ်တ္ၚဲစေၚ် ပြာပ်စဴအာ သ္ၚိဒကာဂမၠိုၚ်တုဲ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ် ဂဇအ်လေဝ်ဂဇအ် ပ္ဍဲသၞာဂဇအ်ရော? တိက်လေဝ်တိက်ရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

860) “ယြဴခမဳဗြဴမွဲ ပ္ဍဲအခိၚ်တ္ၚဲစေၚ် ပြာပ်စဴအာ သ္ၚိဒကာဂမၠိုၚ်တုဲ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ် ဂဇအ်လေဝ်ဂဇအ် ပ္ဍဲသၞာဂဇအ်မ္ဂး၊ တိက်လေဝ်တိက်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။