၄.၂.၅.၁။ ပွံက်သိက္ခာပိုဒ်ပဉ္စမ

856) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ ပ္ဍဲအခိၚ်နူဂယး မ္ဂးဂှ် အခိၚ် သ္ပတမ်နူအခိၚ်အရှိုဏ်တိုန်တုဲ စဵုကဵုတ္ၚဲစေၚ်ရောၚ်။ ဒကာ မ္ဂးဂှ် ဗွဲအစောံသၟိၚ် ဗဗၞး ညးဗၞိက် ညးဒိုက်ဂတ် ရဴဝွံ ဒကာနွံပန်ဂကူအိုတ်ရ။ ပြာပ်အာတုဲ မ္ဂးဂှ် က္ညအာဌာန်ဂှ်တုဲ။ သၞာဂဇအ် မ္ဂးဂှ် သ္ဂးတဴ သၞာမဂဇအ်တၚ်ထွာဲရုပ်ဂပ်ရ။ ဂဇအ်တုဲ မ္ဂးဂှ် ဂဇအ်ဒၟံၚ်ပ္ဍဲသၞာဂဇအ်ဂှ်ရ။ သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ်ဂှ် ပဲါစ္ဍးအာ မ္ဂးဂှ် ဟွံဟီုလဴဗ္စကဵုညးတီကၠိုဟ်ခၠၚ်ပ္ဍဲသ္ၚိဂှ်တုဲ ကုခမဳဗြဴ မကဵုကလိလောန်အာ ဌာန်ဟွံဍေက်ဗြဲ ‘ဒယူသ္ၚိ’ ဂှ် ဒးအာပတ်ပဲါစိုတ်ရ။ ပ္ဍဲအမှဲအကး ကုခမဳဗြဴ မကဵုကလိလောန်အာ ဥပစာဂှ် ဒးအာပတ်ပဲါစိုတ်ရ။

857) ပ္ဍဲမဟဂွံဂရၚ်ပတီလဴဗ္စဏီ မၞုံကဵုစၟတ်သမ္တီ မဟဂွံဂရၚ်ပတီလဴဗ္စဏီဒှ်တုဲ ပဲါစ္ဍးအာမ္ဂး၊ ဒးအာပတ်ပဲါစိုတ်ရ။ ပ္ဍဲမဟဂွံဂရၚ်ပတီလဴဗ္စဏီ မၞုံကဵုသၠေဟ်ပၟာဒှ်တုဲ ပဲါစ္ဍးအာမ္ဂး၊ ဒးအာပတ်ပဲါစိုတ်ရ။ ပ္ဍဲမဟဂွံဂရၚ်ပတီလဴဗ္စဏီ မၞုံကဵုစၟတ်သမ္တီ ဂရၚ်ပတီလဴဗ္စတုဲဒှ်တုဲ ပဲါစ္ဍးအာမ္ဂး၊ ဒးအာပတ်ပဲါစိုတ်ရ။ ပ္ဍဲသၞာမဂဇအ်တၚ်ထွာဲဟွံရုမ်ဂပ်ဂှ် ဒးအာပတ်ဒုက္ကဋ်ရ။ ပ္ဍဲမဂရၚ်ပတီလဴဗ္စတုဲ မၞုံကဵုစၟတ်သမ္တီ မဟဂွံဂရၚ်ပတီလဴဗ္စဏီမ္ဂး၊ ဒးအာပတ်ဒုက္ကဋ်ရ။ ပ္ဍဲမဂရၚ်ပတီလဴဗ္စတုဲ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲမဂရၚ်ပတီလဴဗ္စတုဲ မၞုံကဵုစၟတ်သမ္တီ မဂရၚ်ပတီလဴဗ္စတုဲမ္ဂး၊ ဟွံဒးအာပတ်ရ။

858) ဂရၚ်ပတီလဴဗ္စတုဲ အာမ္ဂး၊ ဒှ်သၞာဂဇအ် ဖျုဲပြံၚ်ဟွံမာန်မ္ဂး၊ ဒှ်ညးဂိယဲမ္ဂး၊ ဟိုတ်နူပရိုက်ဘဲဂမၠိုၚ် အာမ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ပဉ္စမတုဲရ။