၄.၂.၅။ သိက္ခာပိုဒ်ပဉ္စမ

854) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴမွဲဂှ် ဒှ်ခမဳဗြဴအ္စာ မၞုံကဵုဝတ်ပိဏ္ဍပါတ်လၟိုန် ဒကာမွဲတၠရ။ ပ္ဍဲအခိၚ်ဂှ် ခမဳဗြဴဂှ် ပ္ဍဲအခိၚ်နူဂယး သၠောံရုၚ်လ္တက်ပဠေဝ်သ္ၚာတုဲ သီုမဂိုၚ်ထ္ၜကေတ်ဗဗေၚ်သ္ၚာ ပြာပ်စဴအာသ္ၚိဒကာဂှ်တုဲ ဂဇအ်ဒၟံၚ်လတူသၞာလးတုဲမ္ဂး သီုဟွံဂရၚ်ပတီလဴဗ္စကဵုတၠသ္ၚိဂမၠိုၚ်ဂှ် ကလေၚ်စဴအာရ။ ဍိက်ဗြဴ ဒကာဂှ် ကွဟ်ၚးတးသ္ၚိမ္ဂး သၞာဂဇအ်ဂှ် စုတ်ထောံလဝ်ပ္ဍဲအကြာနုၚ်ထၟာဲရ။ မၞိဟ်ဂမၠိုၚ် ဟွံညာတ်ကေတ် သၞာဂဇအ်ဂှ်မ္ဂး “ယွံနာဲဗြဴ သၞာဂဇအ်ဂှ် နွံအလဵုရော?” ရဴဝွံ သၟာန်ခမဳဗြဴဂှ်အိုတ်ရ၊ ယွံဒကာတအ် အဲဟွံညာတ် သၞာဂဇအ်ဂှ်ရ ရဴဝွံ သ္ဂးရ။ “ယွံနာဲဗြဴ ဩဝ်ကဵုသၞာဂဇအ်ဂှ်ညိ” ရဴဝွံ လဗက်ပကီု ဟီုဒက်ဒေါန်တုဲ သပိုတ်ထောံဝတ်ပိဏ္ဍပါတ်အိုတ်ရ။ ပ္ဍဲကြဴနူဂှ် မၞိဟ်ဂမၠိုၚ်ဂှ် ကွဟ်ၚးတးသ္ၚိမ္ဂး ညာတ်ဒး သၞာဂဇအ်ဂှ် ပ္ဍဲအကြာနုၚ်ထၟာဲအိုတ်တုဲ ကလအ်ဇအ်သဝ် ခမဳဗြဴဂှ်တုဲမ္ဂး ကလေၚ်စွံပတန် ဝတ်ပိဏ္ဍပါတ်လၟိုန်အိုတ်ရ။ ပ္ဍဲအခိၚ်ဂှ် ခမဳဗြဴဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “ခမဳဗြဴဂှ် ပ္ဍဲအခိၚ်နူဂယး ပြာပ်စဴအာ သ္ၚိဒကာဂမၠိုၚ်တုဲ ဂဇအ်ဒၟံၚ်လတူသၞာလးတုဲမ္ဂး မုဟိုတ် သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ်ဂှ် ပဲါစ္ဍးအာရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် ပ္ဍဲအခိၚ်နူဂယး ပြာပ်စဴအာ သ္ၚိဒကာဂမၠိုၚ်တုဲ ဂဇအ်ဒၟံၚ်လတူသၞာလးတုဲမ္ဂး သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ်ဂှ် ပဲါစ္ဍးအာရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် ခမဳဗြဴဂှ် ပ္ဍဲအခိၚ်နူဂယး ပြာပ်စဴအာ သ္ၚိဒကာဂမၠိုၚ်တုဲ ဂဇအ်ဒၟံၚ်လတူသၞာလးတုဲမ္ဂး မုဟိုတ် သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ်ဂှ် ပဲါစ္ဍးအာရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

855) “ယြဴခမဳဗြဴမွဲ ပ္ဍဲအခိၚ်နူဂယး ပြာပ်စဴအာ သ္ၚိဒကာဂမၠိုၚ်တုဲ ဂဇအ်ဒၟံၚ်လတူသၞာလးတုဲမ္ဂး သီုဟွံဂရၚ်ပတီလဴဗ္စကဵု တၠသ္ၚိဂမၠိုၚ်ဂှ် ပဲါစ္ဍးအာမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။