၄.၂.၄.၁။ ပွံက်သိက္ခာပိုဒ်စတုတ္ထ

852) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ သဗာန်ဍာ်ဇၞော် မ္ဂးဂှ် သ္ဂးတဴဂၠံၚ်တရဴကွဳစောတ်ရထာရ။ ဂၠံၚ်တရဴဟွံခၠၚ်သာတ် မ္ဂးဂှ် ဂၠံၚ်တရဴမဒးကလေၚ်တိတ် အတိုၚ်မလုပ်ကၠုၚ်ရောၚ်။ ဂၠံၚ်တရဴသွာၚ် မ္ဂးဂှ် သ္ဂးတဴ ဂၠံၚ်ကောံစုမ်ဂၠံၚ်ဝှါ်ရောၚ်။ တြုံ မ္ဂးဂှ် တြုံလကိုဟ်ဟွံသေၚ်၊ တြုံပြိုတ်ဟွံသေၚ်၊ တြုံတိရစ္ဆာန် မပတောံလဝ်မၞိဟ်ဟွံသေၚ်၊ တြုံမၞိဟ်မတီကၠိုဟ်ခၠၚ် မသၟဟ်စောံတၞဟ်နပွမဒတူ ပွမဟီုဂလာန်ရောၚ်။ မွဲဟာန်ကေုာံ မ္ဂးဂှ် မွဲဂကောံရောၚ်။ ညးမွဲကေုာံညးမွဲ မ္ဂးဂှ် တြုံကီု ခမဳဗြဴကီုဒှ်ရ။ ဒတူလေဝ်ဒတူမွဲစွံ မ္ဂးဂှ် တန်တဴပ္ဍဲအပ္ဍဲဟတ္ထပါသ် (ၜါဟတ်မွဲဍ) တြုံမ္ဂး၊ ဒးအာပတ်ပဲါစိုတ်ရ။ ဟီုဂလာန်လေဝ်ဟီုမွဲစွံ မ္ဂးဂှ် သီုမဒတူဒၟံၚ် ပ္ဍဲအပ္ဍဲဟတ္ထပါသ် (ၜါဟတ်မွဲဍ) တြုံဟီုဂလာန်မ္ဂး၊ ဒးအာပတ်ပဲါစိုတ်ရ။ ခမဳဗြဴမဒှ်သကအ်ပွံၚ်လေဝ် ကလေၚ်ဗလးထောံ မ္ဂးဂှ် မမိက်ဒ္ဂေတ်တဴ ဒ္ဂေတ်မဟွံဗဗွဲတုဲ ကလေၚ်ဗလးထောံ ခမဳဗြမဒှ်သကအ်ပွံၚ်မ္ဂး၊ ဒးအာပတ်ပဲါစိုတ်ရ။ သၠးကၠေံဟတ္ထပါသ်ၜါဟတ်မွဲဍတုဲ ဒတူလေဝ်ဒတူမ္ဂး၊ ဟီုဂလာန်လေဝ်ဟီုမ္ဂး၊ ဒးအာပတ်ဒုက္ကဋ်ရ။ ကေုာံလကိုဟ် ပြိုတ် ခမၞုဲ တိရစ္ဆာန်မပတောံလဝ်မၞိဟ် ဒတူလေဝ်ဒတူမ္ဂး၊ ဟီုဂလာန်လေဝ်ဟီုမ္ဂး၊ ဒးအာပတ်ဒုက္ကဋ်ရ။

853) သကအ်ပွံၚ် ညးမတီကၠိုဟ်ခၠၚ် မမိက်ကဵုမွဲမွဲနွံမ္ဂး၊ ဟွံသ္ၚေဝ်မဲ ကဵုပွမလ္ၚုဂြောပ်ဗ္ဒန်မ္ဂး၊ သ္ပအာရီုမွဲသအာၚ်တုဲဒတူလေဝ်ဒတူမ္ဂး၊ ဟီုဂလာန်လေဝ်ဟီုမ္ဂး၊ သီုဟွံမိက်ဒ္ဂေတ်တဴ ဒ္ဂေတ်မဟွံဗဗွဲ ကမၠောန်နွံတုဲ ကလေၚ်ဗလးထောံ ခမဳဗြဴမဒှ်သကအ်ပွံၚ်မ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်စတုတ္ထတုဲရ။